Մեծ Բրիտանիայի թագուհի Եղիսաբեթ II-ն առաջին անգամ խախտելով բազմադարյա ավանդույթները՝ կարիքավորներին ողորմություն է բաժանել ոչ թե անձամբ, այլ կորոնավիրուսի պատճառով փոստով, հայտնում է The Times-ը:
Պարբերականի տեղեկություններով՝ Վինձորի ամրոցում ինքնամեկուսացման մեջ գտնվող միապետը 94 տղամարդու, այդ թվում՝ 100-ամյա Բիլ Ալենին, եւ 94 կնոջ ուղարկել է հատուկ հատված մետաղադրամներ՝ «խոր ափսոսանք» հայտնելով այդ արարողությունն անձամբ իրականացնելու անհնարինության պատճառով, որի արմատները միջնադարում են:
Ընտրված ստացողների թիվը կապված է թագուհու տարեդարձի հետ, որը ապրիլի 21-ին կդառնա 94 տարեկան: Յուրաքանչյուր հասցեատիրոջը հղած նամակում Եղիսաբեթ II-ը նշել է, որ հպատակներին ողորմության բաժանումը ինքը համարում է «իր ամենակարեւոր պարտականություններից մեկը»:
Ողորմության հանձնումը պետք է տեղի ունենար ապրիլի 9-ին՝ Ավագ հինգշաբթի Վինձորի ամրոցի Սուրբ Գեորգիի մատուռում: Հանդիսավոր արարողության ժամանակ թագուհին յուրաքանչյուր հրավիրվածի հանձնելու էր երկուական կաշվե դրամապանակ. սպիտակ՝ հատուկ հատված, շրջանառության մեջ չեղող մետաղադրամներով, եւ կարմիր՝ 5 ֆունտ գումար կազմող սովորական մետաղադրամներով:
«Գիտեմ, որ դուք որպես Մոնդի փող ստացողներ խորապես հիասթափված կլինեք ինչպես եւ ես, որ արարողությունը չի կայանալու, չնայած հասկանում ենք ներկայիս իրադրությունում այդպիսի որոշման անհրաժեշտությունը,- նամակում շեշտել է Եղիսաբեթ II-ը: - Այդուհանդերձ, դա չպետք է նշանակի, որ համայնքի գործերում ձեր անգնահատելի ավանդը աննկատ կմնա, եւ ես այս շռայլ պարգեւն ուղարկում եմ, որ ձեզ շնորհակալություն հայտնեմ ձեր քրիստոնեական ծառայության համար»:
Եղիսաբեթ II-ը գահ է բարձրացել 1952 թվականին 25 տարեկանում: 2015 թվականի սեպտեմբերին նա գերազանցել է Վիկտորյա թագուհու գահակալման տեւողության ռեկորդը, որը կազմել է 23 226 օր 16 ժամ 23 րոպե, եւ դարձել է Մեծ Բրիտանիայի պատմության մեջ ամենաերկար գահակալած միապետը: