Ներկայումս քննարկվում է կորոնավիրուսի համավարակի հետ կապված տեղաշարժման սահմանափակումները եւս մեկ ամսով երկարացնելու հարցը: Այս մասին ապրիլի 10-ին ԱԺ-ում Առողջապահության եւ սոցիալական հարցերի մշտական հանձնաժողովի նիստում «Դեղերի մասին» օրենքում փոփոխություններ եւ լրացումներ կատարելու մասին օրինագծի երկրորդ ընթերցմամբ քննարկման ժամանակ ասաց իշխող «Իմ քայլը» դաշինքի պատգամավոր Սիսակ Գաբրիելյանը:
Պատգամավորի խոսքով՝ կանխատեսումներ կան, որ շատ երկրներ շարունակելու են սահմանափակումներ մտցնել, որոնք տեւելու են մի քանի ամիս:
«Հիմա ավելի արդիական է դառնում առավել կարեւոր դեղամիջոցներ ստանալու հնարավորությունը փոստային ծառայության եւ բեռնափոխադրումների միջոցով»,- պարզաբանեց պատգամավորը:
Նշենք, որ ներկայումս գործող օրենքի համաձայն՝ սահմանը հատելիս անձը կարող է դեղեր տեղափոխել, սակայն արգելվում է այն փոստի միջոցով առաքելը: Նոր կարգավորմամբ՝ առաջարկվում է թույլ տալ դեղերի առաքում փոստային ծառայության միջոցով, բայց ոչ ավելի, քան տարեկան մեկ անգամ:
Պատգամավորներից շատերը օրինագիծը քննադատել են՝ մտահոգություն հայտնելով վերահսկման մեխանիզմների ոչ հստակ լինելու հետ կապված:
Բավականին երկար քննարկումներից հետո հանձնաժողովը ներկայացված օրինագծին կրկին դրական եզրակացություն տվեց: