Թուրքիայի նախագահ Ռեջեփ Թայիփ Էրդողանը չի ընդունել Ներքին գործերի նախարար Սուլեյման Սոյլուի հրաժարականը։
Թուրքական Cumhurıyet-ի փոխանցմամբ՝ Թուրքիայի նախագահի մամուլի ծառայության տարածած հայտարարության մեջ նշվել է, որ ՆԳ նախարարը կարող է հրաժարական ներկայացնել, սակայն այն ընդունել կամ չընդունելու որոշումը նախագահինն է եւ նախագահը չի ընդունում հրաժարականը։ «Նախարարը պետք է շարունակի պաշտոնավարել»,–նշվել է հայտարարության մեջ։
Նշենք, որ Թուրքիայի ՆԳ նախարարը հրաժարական էր տվել այն բանից հետո, երբ փողոց դուրս գալու արգելքից հետո համացանցում հայտնվել էին լուսանկարներ փողոցներում զբոսնող մարդկանցով։ Նա շեշտել էր, որ վիրուսի տարածումը կանխարգելելու համար հայտարարված սահմանափակման խախտման պատասխանատուն ինքն է եւ այս պայմաններում ինքը հրաժարական է տալիս, քանի որ չի կարողանում կանխել մարդկանց փողոց դուրս գալը։