Կրոնական ազատությունների հարցերով ԱՄՆ դեսպանը կրկնել է նոր կորոնավիրուսի համաճարակի ժամանակ խղճի բանտարկյալներին ազատ արձակելու կոչը:
«Մենք ընդունում եւ ողջունում ենք Ադրբեջանում մի քանի հարյուր բանտարկյալի ազատ արձակումը կորոնավիրուսի համաճարակի ֆոնին: Մենք կոչ ենք անում Ադրբեջանին եւ այլ երկրներին պանդեմիայի պայմաններում անհապաղ ազատ արձակել բոլոր նրանց, ովքեր բանտարկվել են իրենց հիմնարար ազատությունների, ներառյալ կրոնական ազատությունների իրացման համար»,- Twitter-ի իր էջին գրառում է կատարել կրոնական ազատությունների հարցերով ԱՄՆ դեսպան Սեմ Բրաունբեքը, հայտնում է Turan-ը:
Մեկ շաբաթ առաջ Թրամփի վարչակազմն ամբողջ աշխարհի կառավարություններին կոչ էր արել «անհապաղ ազատ արձակել հարյուր հազարավոր, եթե ոչ միլիոնավոր բանտարկյալների, որոնք բանտարկված են իրենց կրոնին խաղաղ դավանման համար»:
Իլհամ Ալիեւի հրամանագրով այս ամսվա սկզբին 176 բանտարկյալի ներում էր շնորհվել, բայց հրամանագիրը տարածվել էր միայն երկու կրոնական բանտարկյալի վրա, ովքեր դատապարտվել էին 2015-ին Նարդարանում տեղի ունեցած իրադարձությունների համար:
Միացյալ Նահանգների կրոնական ազատությունների հարցերով մարմինը` USCIRF-ն, ավելի վաղ Ադրբեջանին ներառել էր երկրորդ կարգի երկրների շարքում, ինչը հավատացյալների իրավունքների համակարգված եւ աղաղակող խախտումների առկայություն է նշանակում:
Հասարակական կազմակերպությունների գնահատմամբ` ներկայումս Ադրբեջանում ավելի քան 130 քաղբանտարկյալ կա. նրանց կեսից ավելին կրոնական ակտիվիստներ են: