Արցախի գործող նախագահ Բակո Սահակյանը իր հաջորդին մաղթել է պատասխանատու ղեկավար լինել:
Հիշեցնենք, որ այսօր Արցախում ընթանում է նախագահական ընտրությունների երկրորդ փուլը: Բակո Սահակյանը լրագրողների հետ զրույցում պատասխանելով հարցին՝ ի՞նչ կմաղթեր հաջորդ նախագահին, նշել է, որ իր հաջորդին կմաղթեր ղեկավարվել պատասխանատու վերաբերմունքով: «Դա կնպաստի նրա գործունեության հաջողությանը եւ չլուծված խնդիրների լուծմանը»,- նշել է Սահակյանը:
Արցախի նախագահը չի համաձայնվել դատարկ ընտրական տեղամասերի վերաբերյալ կարծիքին: «Մենք ամեն ինչ արել ենք եւ աշխատանքն այնպես կազմակերպել, որ կուտակումներ չլինեն: Միաժամանակ, մենք նախատեսում էինք, որ երկրորդ փուլում ընտրողներն ավելի քիչ կլինեն: Սա պայմանավորված է անվտանգության խնդիրներով եւ երկրորդ փուլի առանձնահատկություններով»,- նշել է Բակո Սահակյանը:
Նա համոզմունք է հայտնել, որ խորհրդարանական ընտրությունների մասնակիցների համար ստեղծվել էին մրցակցային պայմաններ: «Ես համոզված եմ, որ քաղաքական ուժերի համար ստեղծվել էին առավելագույն հնարավորություններ: Նրանք ձայներ ստացան իրենց աշխատանքին համապատասխան: Կարծում եմ, որ հաջորդ իշխանությունները մրցակցային աշխատանքի պայմաններ կստեղծեն: Խորհրդարանում ներկայացված ուժերը հայտարարել են համագործակցելու պատրաստակամության մասին»,- նշել է Բակո Սահակյանը: