Արցախի գործող նախագահ Բակո Սահակյանը պատրաստ է պատասխանել Ապրիլյան պատերազմի քննիչ հանձնաժողովի հարցերին: Նա այս մասին ասաց լրագրողների հետ հանդիպման ժամանակ:
Բակո Սահակյանը հայտնեց, որն հանձնաժողով այցելելու հրավեր չի ստացել: «Բայց ամեն դեպքում թե՛ ես, թե՛ մյուս բոլորը պատրաստ ենք նպաստելու հանձնաժողովի գործունեությունը տրամաբանական ավարտին հասցնելուն»,- նշեց Արցախի նախագահը՝ ողջունելով երրորդ նախագահ Սերժ Սարգսյանի որոշումը հանձնաժողովի նիստին այցելելու եւ հարցերին պատասխանելու մասին:
Հիշեցնենք, որ Սերժ Սարգսյանը մտադիր է հանձնաժողով այցելել ապրիլի 16-ին:
Մեկնաբանելով Հայաստանի առաջին նախագահ Լեւոն Տեր-Պետրոսյանի վերջերս արած հայտարարությունը՝ Բակո Սահակյանը նշեց, որ դրա մեջ ոչ մի արտասովոր բան չի տեսնում: «Բնական է, որ նախկին ղեկավարներն արտահայտեն իրենց կարծիքը: Նա պատրաստակամություն է հայտնել հնարավորինս օգտակար լինել: Ես ծանոթ եմ տարբեր մեկնաբանությունների եւ չեմ կարծում, որ այդպես է: Կարծում եմ, որ նախկին նախագահը օգտակար լինելու պատրաստակամություն է հայտնում»,- նշեց Բակո Սահակյանը:
