Դեռ շատ երկար կտեւի նիստը: Այս մասին, այսօր՝ ապրիլի 16-ին, ԱԺ-ում լրագրողներին հայտնեց ԱԺ ապրիլյան պատերազմի հանգամանքներն ուսումնասիրող քննիչ հանձնաժողովի նախագահ Անդրանիկ Քոչարյանը՝ անդրադառնալով հարցին, թե դեռ որքան երկար են հարցեր ուղղելու ՀՀ երրորդ նախագահ Սերժ Սարգսյանին:
«Պատգամավորների մոտ դեռ հարցեր կան, հարցից հարց է ծնվում: Հիմա 15 րոպե ընդմիջում ենք անում, հետո շարունակենք մեր աշխատանքը»,-ասաց նա: Նա հավելեց, որ չեն եղել հարցեր, որոնց Սերժ Սարգսյանը չի պատասխանել:
Դիտարկմանը, որ Սերժ Սարգսյանը հայտարարել էր, որ ինքն էլ հարցեր ունի, արդյոք տվել է այդ հարցերը, Անդրանիկ Քոչարյանը զարմացավ. «Հարցե՞ր: Սերժ Սարգսյանը մեզ չի կարող հարցեր տալ: Հարցեր տվողը քննիչ հանձնաժողովն է: Սերժ Սարգսյանը պատասխանում է մեր հարցերին: Իր իրավունքն է՝ պատասխանել, թե չպատասխանել: Սերժ Սարգսյանը ներկայացրել է իր տեսակետները ներածական, մենք ընդունել ենք եւ կկցենք մեր վերջնական եզրակացությանը»:
Ի դեպ, մինչև նիստին մասնակցությունը տարածած իր հայտարարությունում Սերժ Սարգսյանը ասել էր, որ հարցեր ունի ապրիլյանի վերաբերյալ, սակայն չէր ասել, թե մտադիր է այդ հարցերը տալ հանձնաժողովին։
«Ինքս էլ հարցեր ունեմ պատերազմի բոլոր կանոնների համաձայն՝ հայոց բանակի հաղթանակի վերաբերյալ որոշ ուժերի կողմից հասարակության մեջ մութ կասկածներ սերմանելու, զանազան շահարկումների, ապրիլյան պատերազմի խնդրով խորհրդարանական քննիչ հանձնաժողովի ստեղծման նպատակի եւ մի շարք այլ թեմաներով:
Սրանց դեռ միասին կանդրադառնանք եւ եզրակացություններ կանենք»,-ասված է ՀՀ երրորդ նախագահի հայտարարության մեջ: