Վարչապետ Նիկոլ Փաշինյանը շնորհավորական ուղերձ է հղել Սիրիայի Արաբական Հանրապետության նախագահ Բաշար Ալ Ասադին Ազգային տոնի կապակցությամբ: Ուղերձում, մասնավորապես, ասված է.
«Ջերմորեն շնորհավորում եմ Ձեզ եւ Սիրիայի բարեկամ ժողովրդին Սիրիայի Արաբական Հանրապետության ազգային տոնի կապակցությամբ:
Հայ-սիրիական հարաբերություններին հատուկ են պատմականորեն ձեւավորված ամուր բարեկամությունը, փոխադարձ համակրանքը, համագործակցության եւ փոխաջակցության ոգին։
Սիրիական ճգնաժամի ընթացքում Հայաստանն իր հաստատուն աջակցությունն է ցույց տվել Սիրիային, որի խոսուն ապացույցը Հալեպում հայկական մարդասիրական առաքելության գործունեությունն է: Համոզված եմ, որ մեր պետությունների միջեւ ավանդական երկխոսությունը հետագայում եւս կշարունակի ընդլայնվել եւ խորանալ՝ ի շահ մեր երկու բարեկամ ժողովուրդների:
Լիահույս եմ, որ Սիրիան կհաղթահարի առկա ճգնաժամը եւ կթեւակոխի առաջընթացի եւ զարգացման նոր փուլ: Օգտվելով առիթից՝ ցանկանում եմ վերահաստատել մեր հանձնառությունը՝ նպաստելու վերականգնողական գործընթացներին։
Մաղթում եմ Ձեզ քաջառողջություն եւ հաջողություններ, իսկ Սիրիայի բարեկամ ժողովրդին՝ խաղաղություն եւ առաջընթաց»:
