Բա ես ի՞նչ իմանամ, թե ինչ է ուզում ասի Սերժ Սարգսյանը. ամեն դեպքում՝ ՀՀ-ն ազատ եւ ժողովրդավարական պետություն է, այստեղ ցանկացած ոք ցանկացած պահի կարող է հանդիպել լրատվամիջոցներին ու ներկայացնել իր կարծիքը տարբեր հարցերի շուրջ: Այս մասին այսօր՝ ապրիլի 17-ին ԱԺ-ում լրագրողների հետ զրույցում նշեց նախագահ Արարատ Միրզոյան՝ անդրադառնալով Սերժ Սարգսյանի հայտարարությանը, որ պատրաստվում է արտակարգ դրությունից հետո ասուլիս հրավիրել եւ պատասխանել ապրիլյան պատերազմի վերաբերյալ բոլոր հարցերին:
Հարցին, թե ապրիլյան պատերազմի հանգամանքներն ուսումնասիրող ԱԺ քննիչ հանձնաժողովը որեւէ բացահայտում կատարե՞լ է, եւ արդյոք ի վերջո պատասխան կտրվի այդ պատերազմի հետ կապված դավադիր պայմանավորվածությունների մասին հարցին, Արարատ Միրզոյանը պատասխանեց. «Բացահայտումներ արել են, այստեղ հարցն այն է, թե ինչ տրամաչափի: Հիմա ես կարող եմ ասել՝ մի բան բացահայտվել է, դուք կարող եք ասել՝ բայց դա ինչ մի բացահայտում է: Այդպես աշխարհացունց, եկեք սպասենք աշխատանքների ավարտին, նրանք դեռ պետք է անեն վերլուծություն, փաստերը վկայությունները համադրեն: Ոչինչ գաղտնի չի մնա»:
Նա արդարացված է համարում հանձնաժողովի ստեղծումը. «Ես կարծում եմ, որ անկախությունից հետո մեր պատմության հետ կապված որեւէ մութ հարց չպետք է մնա: Ցանկացած հարց, որ հուզում է մարդկանց, պետք է հնարավորության սահմաններում քննվի եւ պարզ ներկայացվի»: