Բոլորովին պատահական չէ այն փաստը, որ 2016 թվականի ապրիլյան պատերազմի հանգամանքների ուսումնասիրման խորհրդարանական հանձնաժողովի նիստերն անցկացվում են փակ դռների հետեւում: Քանի դեռ հանձնաժողովը վերջնական եզրակացությամբ հանդես չի եկել, դրա անդամներն իրավունք չունեն հրապարակել հանդիպումների ընթացքում ստացված տեղեկատվությունը: Այս մասին ապրիլի 20-ին ՀՀ Ազգային ժողովում տեղի ունեցած ավանդական ճեպազրույցի ժամանակ ասաց հանձնաժողովի նախագահ, «Իմ քայլը» իշխող դաշինքի պատգամավոր Անդրանիկ Քոչարյանը:
Ըստ նրա` հանձնաժողովը մի շարք կարեւորագույն հարցեր է ուսումնասիրում: Սակայն ոմանք սկսեցել են տարբեր շահարկումներով հանդես գալ` վկայակոչելով, իբր, «իրենց աղբյուրները»: Նա հասարակությանը կոչ արեց այս հարցում վստահել բացառապես պաշտոնական տեղեկատվությանը:
Հանձնաժողովի ղեկավարն ընդգծեց, որ շատ կարեւոր է, որպեսզի հանձնաժողովի նիստին գա ՀՀ զինված ուժերի գլխավոր շտաբի նախկին պետ, գեներալ-գնդապետ Յուրի Խաչատուրովը: «Սերժ Սարգսյանի հետ մեր հանդիպումից հետո մեզ մոտ նոր հարցեր են առաջացել, որոնք վերաբերում են նաեւ Յուրի Խաչատուրովին»,- պարզաբանեց պատգամավորը:
Ըստ Քոչարյանի` իրենց բոլոր հարցերը քաղաքական ենթատեքստ չունեն եւ վերաբերում են բացառապես ապրիլյան դեպքերին:
