Իրանի ԱԳՆ-ն կանչել է Շվեյցարիայի դեսպանին, որի երկիրը Իրանում ներկայացնում է ԱՄՆ շահերը, կապված Պարսից ծոցում ամերիկյան ԶՈՒ ներկայության հետ, հայտնում է Tasnim-ը:
Իրանի ԱԳՆ մամուլի քարտուղար Աբաս Մուսավին հայտնել է, որ ԱԳՆ կանչված Շվեյցարիայի դեսպանին հայտնել են Թեհրանի «խիստ բողոքը»՝ կապված Պարսից ծոցի հյուսիսային ջրերում եւ Իրանի ափերի մոտ ամերիկյան ԶՈՒ «ապօրինի եւ ապակայունացնող» ներկայության հետ:
Դեսպանին նաեւ հայտարարել են միջազգային ծովային նորմերին եւ նավագնացության ազատությանը հետեւելու անհրաժեշտության մասին:
Շվեյցարիայի դեսպանին հայտնել են, որ Իրանը ամբողջ ուժով կպաշտպանի իր ծովային իրավունքները եւ Պարսից ու Օմանի ծոցերում ԱՄՆ ԶՈՒ կողմից ցանկացած սպառնալիքին եւ սխալ քայլին «համապատասխան պատասխան» կտա:
Հիշեցնենք, որ նախօրեին ԱՄՆ նախագահ Դոնալդ Թրամփը հայտարարել էր, որ հրամայել է ոչնչացնել ամերիկյան նավերին հետապնդող իրանական ռազմանավերը:
«Ես ԱՄՆ ՌԾՈՒ-ին հանձնարարել եմ խփել եւ ոչնչացնել ցանկաված իրանական ռազմանավ, եթե ծովում հետապնդեն մեր նավերին»,- իր թվիթերյան էջում նշել էր Թրամփը: