Եվրոպական հանձնաժողովը եվրոպական տնտեսությունը խորը ռեցեսիայից հետո վերականգնելու ֆինանսավորման 2 տրլն եվրո ծավալով ծրագիր է դիտարկում, հայտնում է Reuters-ը՝ հղում կատարելով Եվրահանձնաժողովի ներքին փաստաթղթին։
Հանձնաժողովն ուզում է օգտագործել 2021-2027թթ․ ԵՄ հաջորդ երկարաժամկետ բյուջեն եւ Recovery Instrument անվանումով նոր հիմնադրամը, որպեսզի խթանի աճը, ասվում է փաստաթղթում։
Եվրահանձնաժողովը, մասնավորապես, առաջարկում է շուկայում 320 մլրդ եվրո փոխառնել, որպեսզի այնուհետեւ այդ գումարի մոտ կեսը տրամադրի ԵՄ անդամ-երկրների կառավարություններին։
Ծրագրի համաձայն, միջոցների մնացած մասը կտրամադրվի ԵՄ երկարաժամկետ բյուջեի շրջանակներում եւ կմարվի 2027 թվականից հետո երկար ժամանակի ընթացքում։ Նաեւ կա ԵՄ բյուջե լրացուցիչ մուծումների հաշվին պարտքի մարման տարբերակ, օրինակ, նոր համաեվրոպական հարկերի տեսքով։
Միջոցների մի մասը ԵՄ անդամ-երկրներին կարող է տրամադրվել դրամաշնորհների տեսքով։
ԵՄ երկրների ղեկավարները ծրագրի իրավական փաստաթղթերին կարող են հավանություն տալ հունիսին, որպեսզի Recovery Instrument-ը կարողանա անհապաղ աշխատել։ ԵՄ նոր երկարաժամկետ բյուջեն կսկսի գործել 2021թ․ հունվարի 1-ից։
ԵՄ առաջնորդները հինգշաբթի օրը տեսակոնֆերանս կանցկացնեն, սակայն ինչպես սպասվում է, չեն ընդունի որեւէ վերջնական որոշում այն մասին, թե կոնկրետ ինչպես ֆինանսավորել տնտեսության վերականգնումը կորոնավիրուսի համավարակից հետո, այս շաբաթ ավելի վաղ լրատվամիջոցին հայտնել էին դիվանագետներն ու պաշտոնյաները։
