Ապրիլի 24-ի՝ արտակարգ ձեւաչափով հիշատակի միջոցառումները Երևանում եզրափակվեցին ուշ երեկոյան մեկնարկած «Ոգեկոչման գիշեր» միջոցառմամբ: Ուղիղ ժամը 22:00-ին Ծիծեռնակաբերդի բարձունքում մեկնարկեց հիշատակի համերգը:
Համերգի բացումը խորհրդանշական էր. աշխարհահռչակ երաժիշտ Նարեկ Հախնազարյանը կատարեց հայրենիքի կարոտի խորհրդանիշ դարձած «Կռունկը»: Հախնազարյանը, ի դեպ, վերջերս է վերադարձել Ռուսաստանից եւ 14 օր գտնվել է մեկուսացման մեջ:
Համերգին զուգահեռ մեկնարկեց նաեւ վիրտուալ երթը. առավոտից քաղաքացիները Հայաստանից, Արցախից եւ Սփյուռքից իրենց անուն ազգանուններն էին ուղարկել խորհրդանշական 1915 համարին (Սփյուռքից՝ 00 374 33 19 15 00): Նրանց բոլորի անունները պատկերվեցին հուշակոթողի 12 սյուներին: Ժամը 23:00-ի դրությամբ վիրտուալ երթին մասնակցելու 852 հազար 341 անուն ազգանուն էր ստացվել:
Լուսային շոուն ապահովել էր C-squared կազմակերպությունը, գույները նույնպես խորհրդանշական էին՝ անմեղ զոհերի թափված արյան կարմիրը եւ անմոռուկի մանուշակագույնը:
Թեեւ Ծիծեռնակաբերդի բարձունքը փակ էր քաղաքացիների համար, եւ ծաղիկներ էին խոնարհել բարձրաստիճան մի քանի պաշտոնյաներ, այնուամենայնիվ, ամեն տարվա նման անմար կրակի մոտ բազմաթիվ ծաղիկներ էին դրված: Կառավարությունը 105 հազար ծաղիկ էր գնել ջերմոցային տնտեսություններից:
Համերգը կավարտվի առավոտյան ժամը 06:00-ին, ինչը հնարավորություն կտա Սփյուռքի մեր հայրենակիցներին նույնպես մասնակցել վիրտուալ երթին: