Եկատերինբուրգի «Ելցինի կենտրոնն» ապրիլի 24-ի երեկոյան հայկական անմոռուկի գույն է ստացել: Այս էմբլեման մշակվել էր 2015-ին Օսմանյան կայսրության կողմից իրականացված Հայոց ցեղասպանության հարյուրամյա տարելիցի առթիվ: Ակցիան կազմակերպել էր ՀՀ պատվավոր հյուպատոսությունը Եկատերինբուրգում: Հիշեցնենք, որ ապրիլի 24-ը Հայոց ցեղասպանության զոհերի հիշատակի օրն է, հաղորդում է «Վեչերնիե Վեդոմոստի»-ն:
Ըստ Եկատերինբուրգում ՀՀ պատվավոր հյուպատոս Նարեկ Սպարտակյանի` Ելցին կենտրոնի ներկայացուցիչները, չնայած այն հանգամանքին, որ այն չի աշխատում կորոնավիրուսի համավարակի կապակցությամբ հայտարարված սահմանափակիչ միջոցառումների պատճառով, ընդառաջեցին եւ համաձայնեցին ֆասադին հայկական անմոռուկի պատկերը ցուցադրել: Էմբլեման արտահայտում է հավերժ հիշատակի թեման, ինչպես նաեւ նախատեսված է խորհրդանշական կերպով հիշեցնելու հայ ժողովրդի անցյալի, ներկայի եւ ապագայի մասին:
Սահմանափակումների ներդրումն անդրադարձել է նաեւ հիշատակի միջոցառումների անցկացման վրա, որոնք այսօր չեն կայացել: Դրանց փոխարեն սոցիալական ցանցերում հայ ժողովրդին սատարող բազմաթիվ գրառումներ են հայտնվել:
Ապրիլի 24-ին Նարեկ Սպարտակյանը եւ նրա հայրը` Արիստակիսը, ծաղիկներ են դրել Մեծ Եղեռնի զոհերին նվիրված հուշարձանի մոտ, որը տեղադրվել էր Եկատերինբուրգի Սուրբ Կարապետ եկեղեցու տարածքում: Ծաղիկներ դնելու արարողությանը մասնակցել են նաեւ Սվերդլովսկի շրջանի մարդու իրավունքների հանձնակատար Տատյանա Մերզլյակովան և Եկատերինբուրգ քաղաքի հայ համայնքի նախագահ Մասիս Նազարյանը:
