Հայաստանի ԱԳ նախարար Էդվարդ Նալբանդյանը դատապարտել է շփման գծում հերթական միջադեպը եւ ցավակցություն հայտնել զոհվածի հարազատներին եւ մտերիմներին:
Նշենք, որ նախօրեին Լեռնային Ղարաբաղի եւ Ադրբեջանի զորքերի շփման գծի հարավարեւելյան (Մարտունու) պաշտպանական ուղղությամբ տեղակայված դիրքերից մեկում ադրբեջանական կողմից արձակված գնդակից, գլխուղեղի շրջանում հրազենային մահացու վիրավորում էր ստացել ՊԲ ժամկետային զինծառայող, 1992թ. ծնված Վազգեն Կառլենի Բախշյանը: Դեպքից անմիջապես հետո, զինվորական հոսպիտալ տեղափոխվելու ճանապարհին վիրավորը մահացել է:
Ինչպես նախարարն ընդգծել է այսօր ԵՄ ընդլայնման եւ հարեւանության քաղաքականության հարցերով հանձնակատար Շտեֆան Ֆյուլեի հետ համատեղ ասուլիսում, նման սադրանքները որեւէ կերպ չեն նպաստում բանակցային գործընթացին:
Նալբանդյանը հիշեցրել է, որ մարտի 5-ին Սոչիում Հայաստանի, Ռուսաստանի եւ Ադրբեջանի նախագահների հանդիպմանը պայմանավորվածություն է ձեռք բերվել շփման գծում միջադեպերի հետաքննություն անցկացնելու վերաբերյալ` ԵԱՀԿ Մինսկի խմբի համանախագահների մասնակցությամբ եւ ԵԱՀԿ գործող նախագահի հատուկ ներկայացուցչի աջակցությամբ:
