Ապրիլի 27-ին ոստիկանության պետ Արման Սարգսյանը տեսակապով զրույց ունեցավ Հայաստանում Եվրամիության դեսպան Անդրեա Վիկտորինի հետ։ Այս մասին հայտնում են ՀՀ ոստիկանության լրատվության ծառայությունից։
Անդրեա Վիկտորինը ողջունելով Արման Սարգսյանին՝ շնորհավորեց Հայաստանի Հանրապետության ոստիկանության պետ նշանակվելու կապակցությամբ։ Նա կարեւորեց նաեւ օրերս Հայաստանի Կառավարության ընդունած՝ ոստիկանության բարեփոխումների ռազմավարությունը:
Տիկին դեսպանը խոսեց նաեւ համավարակի դեմ պայքարում հայ բժիշկների ու ոստիկանների կարեւոր առաքելության մասին եւ նշեց, որ տպավորված է նրանց աշխատանքով։
Ոստիկանության պետ Արման Սարգսյանը շնորհակալություն հայտնելով ջերմ խոսքերի ու գնահատականի համար` նշեց, որ ոստիկանները համավարակի դեմ պայքարի աշխատանքներին զուգահեռ պատվով իրականացնում են իրենց հիմնական գործառույթները՝ հանցագործությունների կանխումն ու բացահայտումը։
Արման Սարգսյանը անդրադարձավ ՀՀ ոստիկանություն եւ Եվրամիություն սերտ համագործակցությանը, մասնավորապես` Եվրոպական Միության ԹԱՅԵՔՍ եւ Արեւելյան գործընկերության ծրագրերի շրջանակներում։ Ներկայացվեցին Եվրոպոլի հետ համագործակցություն ձեւավորելու ուղղությամբ տարվող աշխատանքները:
Անդրեա Վիկտորինը հաջողություն մաղթեց Հայաստանի ոստիկանության բարեփոխումների աշխատանքում եւ աջակցության պատրաստակամություն հայտնեց։
Ոստիկանության պետն էլ իր հերթին շնորհակալություն հայտնեց արդյունավետ համագործակցության համար։
Կողմերը քննարկեցին հետագա համագործակցության ուղղություններին վերաբերող եւ փոխադարձ հետաքրքրություն ներկայացնող այլ հարցեր եւս։