Արեւելյան Եվրոպայի եւ Կենտրոնական Ասիայի երկրների կառավարությունները բռնությամբ են արձագանքում կորոնավիրուսի համավարակին, ինչը հակասում է իրենց պարտավորություններին մարդու իրավունքների պաշտպանության ոլորտում: Այս մասին նշվում է Amnesty International-ի զեկույցում, որը հրապարակվել է ապրիլի 28-ին, հայտնում է Turan-ը:
«Տարածաշրջանում COVID-19-ի համավարակի բռնկմանը զուգահեռ մի շարք կառավարություններ ավելի շատ շահագրգռված են այլախոհության ճնշմամբ, քան հանրային առողջության պաշտպանությամբ»,- հայտարարել է Amnesty International-ի Կենտրոնական Ասիայի մասով խոսնակ Հեզա Մաքգիլը:
«Ղազախստանի իշխանությունները զմրսում են բազմաբնակարան շենքերի մուտքերի դռները` դրանց բնակիչներին արգելափակելու համար, իսկ Չեչնիայում ոստիկանությունը ծեծի է ենթարկում մարդկանց, ովքեր պաշտպանիչ դիմակներ չունեն: Տարածաշրջանի կառավարությունները համավարակը որպես քարտ բլանշ են դիտարկում` մարդու իրավունքների ճնշման համար: Վիրուսը կանխելուն ուղղված ցանկացած կոշտ միջոցառում պետք է սահմանափակված լինի ժամանակով, համաչափ լինի եւ համապատասխանի մարդու իրավունքների չափանիշներին»,- ասել է նա:
Զեկույցում նկարագրվում են ոչ միայն հասարակ քաղաքացիների, այլեւ լրագրողների եւ իրավապաշտպանների իրավունքների ոտնահարման փաստերը` տեղեկատվության տարածումը կանխելու համար:
«Ադրբեջանի եւ Ռուսաստանի կառավարությունները պատասխանատվության են ենթարկել սոցիալական ցանցերի օգտատերերին, լրագրողներին եւ բուժաշխատողներին, որոնք բացահայտ կերպով մատնանշել են իշխանությունների սխալները համավարակի դեմ միջոցների ձեռնարկման հարցում: Ադրբեջանում իշխանությունները COVID-19-ի համավարակը որպես առիթ են օգտագործել ընդդիմության ճնշելու համար: Նախագահ Իլհամ Ալիեւը մարտի 19-ին հայտարարել էր համավարակի ընթացքում «նոր կանոնների» մասին, այդ թվում` ընդդիմության «մեկուսացման» եւ «մաքրման»: Դրանից հետո խուլիգանության կեղծ մեղադրանքով ձերբակալվեց ընդդիմության ակտիվիստ Թոֆիգ Յագուբլուն, իսկ իրավապաշտպան Էլչին Մամեդին ձերբակալեցին գողության մեղադրանքով, նշվում է զեկույցում: