Ուկրաինայի նախկին վարչապետ, «Բատկիվշչինա» կուսակցության առաջնորդ Յուլիա Տիմոշենկոն 148 միլիոն գրիվեն (5.5 միլիոն դոլար) է ստացել ԱՄՆ-ում` որպես փոխհատուցում 2011-2014 թվականների «քաղաքական բռնաճնշումների» համար: Այս մասին նշվում է նրա եկամուտների հայտարարագրում, որը տեղադրվել է Հայտարարագրերի միասնական պետական ռեգիստրի կայքում, փոխանցում է Strana.ua-ն:
2011-ի ապրիլին Ուկրաինայի այդ ժամանակվա գլխավոր դատախազ Ռենատ Կուզմինը հայտարարել էր նոր քրեական գործի հարուցման մասին, ըստ որի Տիմոշենկոն մեղադրվում էր 2009 թվականին Ռուսաստանի հետ գազի պայմանագիր կնքելու ժամանակ իր պաշտոնական լիազորությունների չարաշահման համար:
Քաղաքական գործիչը մեղավոր էր ճանաչվել եւ դատապարտվել էր 7 տարվա ազատազրկման Խարկովի բանտում: 2014-ին նրան ազատ են արձակել: Որպես փոխհատուցման միջոցների ստացման աղբյուրը նշվել է տեխասյան Reid, Collins, Tsai LLP ընկերությունը: