Հայաստանը պատրաստ է Ուկրաինայի հետ երկխոսությանը: Այս մասին մայիսի 4-ին ԱԺ-ում արտաքին հարաբերությունների մշտական հանձնաժողովի նիստին ԱԳՆ 2018-2019 թվականների գործունեության քննարկման ժամանակ ասաց ԱԳ նախարար Զոհրաբ Մնացականյանը՝ պատասխանելով պատգամավորների հարցերին:
Ըստ նրա` Ուկրաինայի հետ երկխոսության հետ կապված խնդիրներ չեն եղել, բայց միեւնույն ժամանակ լուրջ անհանգստություն է եղել Ուկրաինայի որոշ դիրքորոշումների կապակցությամբ: «Սա գաղտնիք չէ: Մեր մոտեցումն այն է, որ երկխոսությունը երկկողմ հարաբերություններում հիմնախնդիրները չեզոքացնելու ուղիների որոնումը շարունակելու միակ միջոցն է: Ուկրաինայի հետ մենք բարեկամության եւ աշխատանքի մեծ փորձ ունենք, հարաբերությունների լայն օրակարգ, մեր ժողովուրդները միմյանց լավ գիտեն պատմական առումով, մենք օտար չենք: Հայաստանը շատ կարեւոր համայնք ունի Ուկրաինայում, Հայաստանի քաղաքացիները, ուկրաինացիները կամուրջ են հարաբերությունների զարգացման մեջ»,- հայտարարեց նախարարը` հավելելով, որ Հայաստանն առաջնորդվում է հետեւյալ սկզբունքով` փոխհարաբերություններ չստեղծել մի գործընկերոջ հետ մյուսների հաշվին: