ՀՀ վարչապետ Նիկոլ Փաշինյանի որոշմամբ, Արգիշտի Քյարամյանը ազատվել է Քննչական կոմիտեում նշանակված պաշտոնից:

Որոշման մեջ նշվում է.. «Ղեկավարվելով «Հայաստանի Հանրապետության քննչական կոմիտեի մասին» Հայաստանի Հանրապետության օրենքի 20-րդ հոդվածի 5-րդ մասով և 22-րդ հոդվածի 1-ին մասի 2-րդ կետով՝

Արգիշտի Քյարամյանին ազատել Հայաստանի Հանրապետության քննչական կոմիտեի նախագահի տեղակալի պաշտոնից»:

Այսօր արդեն ՀՀ նախագահ Արմեն Սարգսյանի հրամանագրով Արգիշտի Քյարամյանը նշանակվել է ԱԱԾ տնօրենի տեղակալ:

«Հիմք ընդունելով վարչապետի առաջարկությունը` նախագահ Արմեն Սարգսյանը այսօր հրամանագիր է ստորագրել, ըստ որի Արգիշտի Քյարամյանը նշանակվել է Հայաստանի Ազգային անվտանգության ծառայության տնօրենի տեղակալ»,-ասված է հրամանագրում:

Հատկանշական է, որ Քյարամյանը ՔԿ նախագահի տեղակալ էր նշանակվել երեկ եւ այդ պաշտոնում մնաց ընդամենը մեկ օր: Երեկ Քյարամյանն ազատվել էր Պետական վերահսկողության ծառայության ղեկավարի տեղակալի պաշտոնից եւ նշանակվել ՔԿ նախագահի տեղակալ:

Ամեն ինչ էլ ավելի հետաքրքիր է դառնում այն առումով, որ նա ՔԿ նախագահի 5-րդ տեղակալն էր, իսկ այդ հաստիքը ավելացվել էր ապրիլի 30-ի կառավարության որոշմամբ:

Նշենք, որ Hraparak.am-ը այսօր ավելի վաղ արդեն տեղեկացրել էր, որ Արգիշտի Քյարամյանը նշանակվելու է Ազգային անվտանգության ծառայության տնօրենի տեղակալ։ ԱԱԾ ղեկավար կազմում աշխատելու հետ կապված օրենքը որոշակի պահանջներ ունի՝ անձը պետք է իրավապահ համակարգում համապատասխան աշխատանքի ստաժ ունենա։ Այս միջանկյալ պաշտոնն այդ ստաժն ապահովելուն է ուղղված։

Ներկայացնում ենք ՔԿ պետի 29-ամյա տեղակալի կենսագրությունը.

Արգիշտի Քյարամյան

Ծննդյան տարեթիվ, ամսաթիվ, ծննդավայր

1991 թ․, մայիսի 22, Գեղարքունիքի մարզի Երանոս գյուղ

Կրթություն

2013թ. –ավարտել է Երևանի պետական համալսարանի իրավագիտության ֆակուլտետը՝ ստանալով բակալավրի աստիճան

2015թ. ավարտել է ՀՀ արդարադատության ակադեմիայում դատախազի թեկնածությունների ցուցակում ընդգրկված անձանց մասնագիտական պատրաստման դասընթացը

2016թ. ավարտել է Երևանի պետական համալսարանի իրավագիտության ֆակուլտետի մագիստրատուրան՝ ստանալով ԵՊՀ իրավագիտության մագիստրոսի աստիճան

Աշխատանքային գործունեություն

2013-2014թթ. —  ՀՀ ոստիկանության  ԵՔՎ, ապա ՀՀ ՔԿ ԵՔՔՎ Քանաքեռ-Զեյթուն քննչական բաժնի քննիչ

2016թ. ՀՀ դատախազության Շիրակի մարզի  դատախազության դատախազ

2016-2018թթ. — ՀՀ դատախազության Երևան քաղաքի  դատախազության դատախազ

2018թ. հունիսի 8-ից — ՀՀ ԿԱ ՊԵԿ  իրավախախտումների հայտնաբերման ու վարչական վարույթների իրականացման վարչության պետ

2018թ. հուլիսի 10-ից — ՀՀ ԿԱ ՊԵԿ   հետաքննության  վարչության պետ

2019թ. փետրվարի 15-ից  — ՀՀ ՊԵԿ հետաքննության և օպերատիվ-հետախուզության վարչության պետի տեղակալ

2019թ. մարտի 1-ից – ՀՀ պետական վերահսկողական ծառայության ղեկավարի օգնական

2019թ. ապրիլի 10-ից —  ՀՀ Վարչապետի որոշմամբ՝ ՀՀ պետական վերահսկողական ծառայության ղեկավարի տեղակալ

2019թ․ ապրիլի 25-ից — ՀՀ պետական վերահսկողական ծառայության ղեկավարի պարտականությունները կատարող

Այլ տվյալներ

2009-2011թթ.  — ծառայություն ՀՀ զինված ուժերում (հանդիսանում է պահեստազորի սպա)

2014թ. — շնորհվել է արտահերթ կոչում

2016թ. – ունի ՀՀ դատախազության երկրորդ դասի խորհրդականի դասային աստիճան

2017թ. — պարգևատրվել է գերատեսչական մեդալով

2018թ. — շնորհվել է հարկային ծառայության փոխգնդապետի հատուկ կոչում

Անձնական տվյալներ

Ամուսնացած է, ունի երկու զավակ։