Anews.az լրատվական կայքի թղթակից Զաուր Գամբարովին ծեծել են Սոցիալական պաշտպանության պետական հիմնադրամի Գեդաբեկի շրջանային բաժանմունքի ղեկավար Էլսուն Խուդավերդիեւը եւ նրա վարորդ Իսֆանդիյար Գալանդարովը:
Միջադեպը տեղի է ունեցել մայիսի 4-ին, երբ Գամբարովը եկել է բաժանմունք՝ ստացած բողոքի հետաքննություն անցկացնելու համար, հայտնում է Turan-ը:
Հիմնադրամի ղեկավարի տեղակալ Իբրահիմ Ալեսքերովի հետ զրույցի ընթացքում աշխատասենյակ է ներխուժել Գալանդարովը եւ սկսել լրագրողին վիրավորել, նշված է Anews.az-ի հաղորդագրության մեջ:
Գալանդարովը սկսել է լրագրողին սպառնալ եւ պահանջել է միջանցք դուրս գալ «խոսելու»: Միջանցքում Գալանդարովը շարունակել է լրագրողին վիրավորել: Դրան ներկա Խուդավերդիեւը նկատել է, որ լրագրողը բջջային հեռախոսով ձայնագրում է տեղի ունեցողը, եւ այն խլել է թղթակցի ձեռքից, այնուհետեւ վայր գցել ու ոտքով հարվածել: Երբ թղթակիցը փորձել է հեռախոսը հետ վերցնել, պաշտոնյան հարվածել է նրա ձեռքերին: Ծեծկռտուքը շարունակվել է եւս որոշ ժամանակ:
Խմբագրությունը միջադեպի հետ կապված դիմել է աշխատանքի եւ բնակչության սոցիալական պաշտպանության նախարարություն: Սակայն այս գերատեսչությունում թղթակցին են մեղադրել պաշտոնյային վիրավորելու համար:
Խմբագրությունը նախարարություն է ներկայացրել ջարդված հեռախոսը եւ Գամբարովի արյունոտված ձեռքի լուսանկարը, իսկ տեղի ունեցածը գրանցել են Հիմնադրամի տեսահսկման խցիկները:
Կայքը դիմել է իրավապահ մարմիններին՝ խնդրելով Խուդավերդիեւին եւ նրա վարորդին պատասխանատվության ենթարկել: Խմբագրությունը դիմել է նաեւ Ադրբեջանի նախագահին՝ շրջանում կամայականություն գործող անձանց պատժելուն նպաստելու խնդրանքով: