Արցախում բնակվող ադրբեջանահայ փախստականների համար ամենամեծ խնդիրը մնում է բնակարանային հարցը: Այս մասին առցանց մամուլի ասուլիսին, ներկայացնելով տարեկան զեկույցը 2019 թվականի գործունեության արդյունքների եւ մարդու իրավունքների վիճակի վերաբերյալ, ասաց Արցախի օմբուդսմեն Արտակ Բեգլարյանը:
Նրա խոսքով` բնակարաններով դեռ ոչ բոլոր փախստականներն են ապահովված, նրանց մի մասը բնակարաններ ստանալու ցուցակներում են: Սակայն բնակարանների տրամադրման ծրագիրը դադարեցվել է այլ ծրագրերի անցկացման հետ կապված, նշել է Մարդու իրավունքների պաշտպանը: «Պետությունը պետք է որոշի` կստանան ցուցակներում գտնվող մարդիկ բնակարան, թե ոչ»,- հիշեցրեց Բեգլարյանը:
Միեւնույն ժամանակ, օմբուդսմենը նշեց, որ անհանգստացնում է այն, որ փախստականների իրավունքները խախտվել են միջազգային հանրության կողմից: «Արցախում ապրող փախստականները մեր կարգավիճակի պատճառով աջակցություն չեն ստանում միջազգային կազմակերպություններից»,- նշեց Բեգլարյանը` ընդգծելով փախստականների մասնակցության կարեւորությունը բանակցային գործընթացի բոլոր ձեւերին` պաշտոնապես եւ ոչ պաշտոնապես:
«Սակայն այնպիսի տպավորություն է, որ միջազգային կազմակերպությունները նախապատվություն են տալիս ադրբեջանցի փախստականներին հայերի համեմատ, հատկապես` Արցախում ապրող: Սա անընդունելի է»,- հայտարարեց Արցախի օմբուդսմենը:
