Ռնգեղջյուրը մեռած է հայտնաբերվել Հնդկաստանի Ասամ նահանգի Կազիրանգ ազգային այգում, որտեղ ապրում է աշխարհում հնդկական ռնգեղջյուրների (Rhinoceros unicornis) ամենամեծ համայնքը։ Այգու աշխատակիցները հայտարարել են, որ համավարակի հետ կապված կարանտինը կենդանիներին ավելի խոցելի է դարձրել որսագողերի համար։ Ճանապարհներին տրանսպորտային միջոցների բացակայության պատճառով կենդանիները այգու սահմաններին ավելի մոտ են տեղափոխվում եւ կարող են չարագործների հարձակման զոհ դառնալ, հայտնում է Nat-geo-ն։

«Կասկած կա, որ ռնգեղջյուրը սպանվել է 2-3 օր առաջ»,- ասել է Կազիրանգ այգու տնօրեն Պ․ Սիվակումարը։

Նրա խոսքերով՝ որսագողերի նպատակը եղել է կենդանու եղջյուրը, որի համար «սեւ շուկայում» մինչեւ 150 000 դոլար կարելի է ստանալ։ Ռնգեղջյուրի մարմինը հրազենային վնասվածքներով գտնվել է ջրամբարի մոտ, որտեղ հայտնաբերվել են նաեւ 8 դատարկ АК-47 պարկուճներ։ Այգու աշխատակիցները պատմել են, որ ապրիլին իրենց հաջողվել է կանխել որսագողության հինգ փորձ։

Հնդկական ռնգեղջյուրները լայնորեն տարածված են եղել տարածաշրջանում, սակայն որսը եւ բնակության վայրի նվազումը կրճատել է դրանց թիվը մինչեւ մի քանի հազարի։ 2018թ․ արված հաշվարկներով՝ Կազիրանգի ազգային այգում ապրել է 2413 ռնգեղջյուր։

850 ք/կմ տարածքով այգին ստեղծվել է 1908 թվականին՝ այն բանից հետո, երբ բրիտանական նահանգապետի կինը բողոքել է այդ տարածքում ռնգեղջյուրների բացակայությունից։ Այժմ Կազիրանգում, բացի հնդկական ռնգեղջյուրներից, ապրում են նաեւ վագրեր, փղեր, հովազներ եւ այլ կենդանիներ։