Երեւանի ընդհանուր իրավասության՝ «Էրեբունի-Նուբարաշենի» նստավայրում, նախագահությամբ՝ դատավոր Գայանե Խաչատրյանի, այսօր՝ մայիսի 13-ին, «Հրայր Թովմասյանն ընդդեմ Նիկոլ Փաշինյանի» առաջին դատական նիստն հետաձգվեց, քանի որ հայցվոր կողմը ներկա չէր դատական նիստին։

Հայցվոր կողմը չէր ներկայացել երկրում ստեղծված համավարակով պայմանավորված։

Դատարանը նշեց, որ հայցվորի ներկայությունը կարեւոր է նաեւ այնքանով, որ այսօր նախնական դատական նիստն է, եւ ներկայացուցիչը պետք է ներկայացներ իրավական եւ փաստական հանգամանքները. «Արդյունավետ է, որ 2 կողմերը ներկա լինեն դատական նիստին»։

Պատասխանող կողմն ասաց, որ նիստը հետաձգելու վերաբերյալ ներկայացված միջնորդությանն ինքը ծանոթ չի։ Նա նշեց, որ միջնորդությունը պետք է ուղարկվեր նաեւ իրեն։

Պատասխանողի ներկայացուցիչն առարկեց դատարանի գործողությունների դեմ՝ նշելով, որ դատական նիստն անիմաստ է հետաձգվում։

Դատարանի որոշմամբ նիստը հետաձգվեց, եւ հաջորդ դատական նիստը նշանակվեց հունիսի 19-ին, ժամը 11։00-ին։

Հիշեցնենք, որ վարչապետ Նիկոլ Փաշինյանը կապանյան ասուլիսի ժամանակ հայտարարել էր, որ ՍԴ նախագահն իրեն առաջարկել է իր ծառայությունները գործող իշխանություններին, ինչին ի պատասխան Թովմասյանը հայտարարել էր՝ եթե վարչապետն փաստ չներկայացնի, որ ինքն իր ծառայություններն է առաջարկել իշխանությանը, զրպարտության վերաբերյալ հայցով դիմելու է դատարան:

Այնուհետեւ վարչապետը գրիչի լուսանկար էր հրապարակել, որը Թովմասյանն էր իրեն նվիրել՝ «Հայաստան» համահայկական հիմնադրամի հոգաբարձուների խորհրդի նիստի ժամանակ։