ՀՀ երկրորդ նախագահ Ռոբերտ Քոչարյանին կալանքի տակ թողնելու տրամաբանական պատճառ ասել հնարավոր չի։ Այս մասին այսօր՝ մայիսի 13-ին, դատարանի որոշումից հետո լրագրողների հետ զրույցում ասաց Քոչարյանի պաշտպան Արամ Վարդեւանյանը։
«Ես իսկապես ցավում եմ, որ մենք նման երեւույթի ականատեսն ենք լինում։ Լինելով Եվրոպայի խորհրդի անդամ երկիր, լինելով իրավունքի գերակայությունը որպես սահմանադրական սկզբունք հռչակած երկիր։ Երբ տարբեր միջնորդություններ մերժվում էին, կարելի էր ասել, որ իրավունքի փշուրներ էին թողնվում, այժմ այդ փշուրներն էլ չկան եւ դա շատ ցավալի է»,- ասաց նա։
Նշենք, որ փաստաբանական թիմը ներկայացրել էր 3 միջնորդություն։ Վարդեւանյանն ասաց, որ դատավոր Աննա Դանիբեկյանը չընթերցեց Հովհաննես Խուդոյանի միջնորդության վերաբերյալ հատվածը։
«Ես իրավական որեւէ պատասխան չեմ կարող տալ, որովհետեւ դուք պատկերացրեք մի երկիր, որտեղ գործը տեւական ժամանակ գտնվում է դատաքննության փուլում եւ այդ պարագայում հեղինակավոր մարդկանց անձնական երաշխավորությունը մերժում է, այդ թվում Կարեն Կարապետյանի հեղինակությունը Դատախազությունն ընդունել էր»։
Նշենք, որ Ռոբերտ Քոչարյանը դատարանի որոշման հրապարակմանը ներկա չէր։ Նա վիրահատվել է եւ գտնվում է «Իզմիրյան» բկ-ում։
Հիշեցնենք, որ փաստաբանները ներկայացրել էին Քոչարյանի կալանավորումը ՀՀ եւ Արցախի նախկին վարչապետերի անձնական երաշխավորությամբ փոխարինելու, կալանքը վերացնելու եւ նրա նկատմամբ գրավը թույլատրելի ճանաչելու միջնորդությունները։
Որպես անձնական երաշխավոր դատարան էին ներկայացել ՀՀ նախկին վարչապետեր Վազգեն Մանուկյանը, Խոսրով Հարությունյանը, Կարեն Կարապետյանը եւ Արցախի նախկին վարչապետ Անուշավան Դանիելյանը։
