Արդեն 2 տարի շարունակում է չլուծված մնալ Ամուլսարի խնդիրը եւ վարչապետն էլ տարբեր առիթներով ասել է, որ դա ինչ-որ չափով խոչընդոտում է ներդրումներին, հատկապես համավարակի արդյունքում ստեղված տնտեսական ճգնաժամի պայմաններում արդյոք խնդիրն ավելի հրատապ չի՞ դառնում։ Վարչապետը բազմիցս խնդրել եւ կոչ է արել ապաշրջափակել հանք տանող ճանապարհները, բայց կոչերին արձագանք չի եղել։ Ինչպե՞ս է պատրաստվում վարչապետն այս խնդիրը լուծել։ Այսպիսի հարց հնչեց վարչապետ Նիկոլ Փաշինյանի մեծ ասուլիսի ժամանակ:
Ի պատասխան Նիկոլ Փաշինյանն ասաց. «Մենք հույս ունեինք, որ Ամուլսարի հետ կապված քրեական գործը հիմա արդեն հանգուցալուծման հասած կլինի կամ գոնե առաջիկայում։ Կորոնավիրուսն այդտեղ էլ իր նեգատիվ դեր կատարեց, որովհետեւ «Էլլարդի» փորձագետները պետք է գային շատ կարեւոր հարցաքննության մասնակցելու համար, սակայն կորոնավիրուսի պատճառով չկարողացան ժամանել։ Հարցի լուծման բանաձեւը այդ քրեական գործի օբյեկտիվ ընթացքն է եւ օբյեկտիվ հանգուցալուծումը»։
