Եվրասիական տնտեսական բարձրագույն խորհրդի նիստը նախատեսվում է անցկացնել հոկտեմբեր-նոյեմբերին Մինսկում առերես ձեւաչափով: Այսպիսի որոշում է ընդունվել այսօր Եվրասիական տնտեսական բարձրագույն խորհրդի նիստում, որն ընթացել է տեսակոնֆերանսի ձեւաչափով, փոխանցում է ԲԵԼՏԱ-ն:
Եվրասիական տնտեսական բարձրագույն խորհրդի նիստը առերես ձեւաչափով անցկացնելու առաջարկով հանդես է եկել Բելառուսի նախագահ Ալեքսանդր Լուկաշենկոն: «Ես կցանկանայի առաջարկել, որ մեր այսօրվա խորհուրդը դիտարկեն որպես էքստարածքային խորհուրդ: Հաշվի առնելով ԵՏՄ-ում Բելառուսի նախագահությունը՝ ես մեծ հույս ունեմ ԵՏՄ անդամ պետությունների ղեկավարների հանդիպումն անցկացնել առերես ձեւաչափով եւ կառաջարկեի այն անցկացնել Մինսկում այն ժամանակ, երբ բոլորը կարող են գալ»,- նշել է Բելառուսի առաջնորդը: Նա հավելել է, որ ԵՏՄ գծով նման միջոցառումները վերջին 5 տարում Բելառուսի մայրաքաղաքում չեն անցկացվել:
Ալեքսանդր Լուկաշենկոն նաեւ ընդգծել է, որ իր նախաձեռնությունը չի բացառում անհրաժեշտության դեպքում տեսակոնֆերանսի ձեւաչափով խորհրդի նիստի կազմակերպումը մինչեւ այն ժամանակը, երբ կկայանա առերես հանդիպումը:
Նիստի մասնակիցները համաձայնվել են բելառուսական պետության ղեկավարի առաջարկին: Միջոցառման կոնկրետ օրը կորոշվի ավելի ուշ:
