Կառավարությունն իր այսօրվա՝ մայիսի 21-ի նիստում որոշում կայացրեց, ըստ որի մինչև այս տարվա դեկտեմբերի 31-ը «Իրան-Հայաստան 400 կՎ լարման էլեկտրահաղորդման օդային գծի կառուցում» ծրագրի գլխավոր կապալառու իրանական «Սանիր» ընկերության օտարերկրյա քաղաքացի աշխատակիցներն ազատվում են մուտքի արտոնագրի տրամադրման համար նախատեսված պետական տուրքի վճարումից:
Որոշման հիմնավորման մեջ նշվում է, որ «Իրան-Հայաստան 400 կՎ լարման էլեկտրահաղորդման օդային գծի կառուցում» ծրագրի գլխավոր կապալառու է հանդիսանում իրանական «Սանիր» ընկերությունը։ Ներկայումս իրականացվում է ընկերության աշխատակիցների՝ Հայաստան մուտքի արտոնագրի տրամադրման գործընթացը:
Հաշվի առնելով ծրագրի կարևորությունը, ինչպես նաև երկու երկրների միջև առկա գործընկերային և փոխշահավետ համագործակցությունը՝ անհրաժեշտություն է առաջացել «Սանիր» ընկերության աշխատակիցներին տրամադրելու անվճար մուտքի արտոնագիր:
Որոշման նախագծով առաջարկվում է «Իրան-Հայաստան 400 կՎ լարման էլեկտրահաղորդման օդային գծի կառուցում» ծրագրի գլխավոր կապալառու իրանական «Սանիր» ընկերության օտարերկրյա քաղաքացի աշխատակիցներին ազատել մուտքի արտոնագրի տրամադրման համար նախատեսված պետական տուրքի վճարումից:
