ԱՄՆ Պետդեպարտամենտը ժամանակավորապես դադարեցրել է բոլոր վիզաների տրամադրումը, եւ այդ աշխատանքների վերսկսման հստակ ամսաթիվ դեռ չկա: Այս մասին Ֆեյսբուքում ուղիղ եթերի ժամանակ հայտարարեց ՀՀ-ում ԱՄՆ արտակարգ եւ լիազոր դեսպան Լին Թրեյսին:
Նա պարզաբանել է, որ այն քաղաքացիները, որոնց հարցազրույցները չեղարկվել են, այդ մասին կտեղեկանան էլեկտրոնային նամակի միջոցով:
«Ինչ վերաբերում է վիզայի համար վճարումներին, ապա այդ գումարը գործում է մեկ տարվա ընթացքում»,-հավելել է Թրեյսին:
Դեսպանը նշել է, որ ԱՄՆ մուտքի սահմանափակումները չեն գործում ԱՄՆ քաղաքացիների, անձանց համար, ովքեր մշտական բնակության թույլտվություն ունեն, եւ նրանց համար, ովքեր սահմանափակումների սահմանման օրն արդեն մուտքի վիզա են ունեցել:
«ԱՄՆ այն քաղաքացիները, ում անձնագրերի ժամկետն ավարտվել է, կարող են դիմել դեսպանատուն եւ ժամանակավոր անձնագրեր կամ անձը հաստատող փաստաթուղթ ստանալ: Եթե կան հարցեր, այդ թվում կապված Գրին քարտ ստանալու հետ, ապա մանրամասներին կարելի է ծանոթանալ դեսպանատան կայքում»,-եզրափակել է դեսպանը: