Ավստրիայի կանցլեր Սեբաստիան Կուրցը կարծում է, որ գիշերը երկրի նախագահ Ալեքսանդր Վան Դեր Բելենի այցը ռեստորան կարող է շատ ցուցադրել, թե ինչպես են ավստրիացիները ուրախանում կորոնավիրուսի համավարակի պատճառով մտցված սահմանափակման միջոցառումների չեղարկման համար, հայտնում է ՏԱՍՍ-ը։
Կիրակի օրը հայտնի էր դարձել, որ Վիեննայի ոստիկանությունը Ավստրիայի նախագահ Վան Դեր Բելենին եւ նրա կնոջը՝ Դորիս Շմիդաուերին, բռնացրել է իտալական ռեստորանի ամառային պատշգամբում ըմպելիքների շուրջ զրուցելիս։ Ռեստորանը, ըստ առողջապահության նախարարության հրահանգի, պետք է փակվեր երեկոյան 23։00։ Ռեստորանի տիրոջը կարող են 30 000 եվրոյի տուգանել՝ աշխատանքային ժամերի խախտման համար։ Հյուրերը տեսականորեն կարող են ռեստորանի թույլտվությամբ շարունակել նստել սեղանների շուրջը, սակայն նրանց չի կարելի ուտելիք եւ ըմպելիք մատուցել։ Նախագահին եւ նրա կնոջը որեւէ հետեւանք չի սպառնում։
«Ես առաջին անգամ «լոքդաունի» սկզբից գնացել եմ սնվելու երկու ընկերներիս եւ կնոջս հետ։ Մենք խոսքով ընկանք եւ մոռացանք ժամանակի մասին։ Ես, իսկապես, ափսոսում եմ դրա համար։ Դա սխալ էր։ Եթե ռեստորանը դրա պատճառով վնաս կրի, ես պատասխանատվությունը իմ վրա կլինի»,- Twitter-ում գրել է նախագահը։
Ավստրիան ԵՄ-ում առաջինն էր, որ ապրիլի 14-ից սկսեց աստիճանաբար հանել կորոնավիրուսի տարածման դեմ ներդրված սահմանափակումները: Մայիսի 1-ին իշխանությունները վերացրեցին ինքնամեկուսացման ռեժիմը, բացեցին բոլոր խանութներն ու սպասարկման ոլորտի հաստատությունները: Մայիսի 15-ից բացվեցին ռեստորանները, թանգարանները, կենդանաբանական այգիները, բացվեցին մարզադաշտերը եւ դպրոցները: Մարդիկ պետք է հեռավորություն պահպանեն հասարակական վայրերում, կրեն պաշտպանիչ բժշկական դիմակներ՝ տրանսպորտում, խանութներում եւ հանրային տարածքներում:
Մայիսի 29-ից իշխանությունները կսկսեն սահմանափակող միջոցառումների վերացման չորրորդ փուլը ՝ կբացվեն հյուրանոցները, հանգստի կենտրոնները, լողավազանները եւ թույլ կտրվի անցկացնել մինչեւ 100 հոգանոց մշակութային միջոցառումներ: Ապրիլին սահմանափակումների փուլային մեղմացումը սկսվել է վարակվածների թվի ամենօրյա աճի 40%-ից մինչեւ 1% նվազման հետեւանքով: Մայիսին դեպքերի թվի աճը կազմում է ոչ ավելի, քան օրական 100 մարդ: Ներկայում Ավստրիայում 16 539 վարակվածներից ապաքինվել է 15 138 մարդ, 641 մարդ մահացել է:
