Ես կողմ եմ քվեարկել Կոմիտաս 59 հասցեի տարածքում հողի նշանակությունը փոխելու համար, որովհետեւ հասկացել եմ, որ այդտեղ գործարան չի կարող լինել, բայց ես պատկերացում չունեի, որ այդտեղ 3 բարձրահարկ շենք են նախատեսում կառուցել: Այս մասին, այսօր՝ մայիսի 26-ին Երեւանի ավագանու նիտում իր ելույթում նշեց «Իմ քայլը» խմբակցության անդամ Իզաբելա Աբգարյանը:
«Կարծում եմ՝ սա վերջնական չէ, որովհետեւ դեռ ոչ բոլոր փուլերով է անցել: Այստեղ խնդիր է առաջանում, քանի որ քաղաքացիների ակնկալիքներն ու դժգոհությունները ուղղում են ավագանուն, բայց արդյոք ավագանին կարող է որոշել, թե ինչ գույնի պետք է լինի շենքը: Չի կարող որոշել: Արդյոք ավագանու անդամը կարող է որոշել՝ այս շենքը կառուցվի, թե ոչ: Միայն կարող է չփոխել հողի նշանակությունը, բայց այդ դեպքում կարող ենք ստանալ ամայի տարածքներ:
Գործադիրն էլ շատ հաճախ չի կարող մերժել, որովհետեւ գոյություն ունեն չափանիշներ եւ եթե չափանիշներին համապատասխանում է, գործադիրի մերժումը կարող է սուբյեկտիվություն լինել»,-ասաց նա:
Աբգարյանը նաեւ հավելեց. «Եթե դուք Արաբկիրում այդքան բարձրահարկեր եք ավելացնում, վաղը դուք էլ եք մնալու խցանման մեջ: Դուք էլ տրանսպորտ չեք ունենալու: Կամ եթե երեք բարձրահարկ շենք եք կառուցում, բարի եղեք, կողքը մանկապարտեզ կառուցեք»:
