Հայաստանում վաճառվող հողերի համար մեկնարկային գնի ցածր շեմը կբարձրացվի: Այս մասին մայիսի 26-ին Ազգային ժողովի նիստին Հողային օրենսգրքում փոփոխություններ եւ լրացումներ կատարելու մասին օրինագծի քննարկման ժամանակ հայտարարեց ՀՀ տարածքային կառավարման եւ ենթակառուցվածքների նախարար Սուրեն Պապիկյանը:
Նախարարի խոսքով՝ հողերի օտարումը կիրականացվի բացառապես մրցակցային հիմունքներով: Ընդ որում վաճառքի հանված հողերի մեկնարկային գինը դրանց կադաստրային արժեքի 50 տոկոսից կբարձրացվի մինչեւ 100 տոկոս: Մրցույթին մասնակցել ցանկացող անձը պետք է վճարի մեկնարկային գնի 5 տոկոսը, ինչից հետո մասնակցության վկայագիր կստանա:
«Մրցույթների կազմակերպման եւ անցկացման իրավունքը կփոխանցվի տեղական իշխանություններին, որոնք կպարտավորվեն են մրցութային հանձնաժողովներ ձեւավորել: Ընդ որում, մրցույթը չի կարող համարվել վավեր, եթե դրանում ներկայացված չէ առնվազն երկու մասնակից », - պարզաբանեց Պապիկյանը:
Օրինագծով նաեւ հողերի նպատակային նշանակությունը փոխելու հնարավորություն է նախատեսվում: Առաջարկվող միջոցառումները, ինչպես նշեց նախարարը, ուղղված են գյուղատնտեսական արտադրության մեջ ներդրումների ներգրավմանը, այդ թվում՝ սպանդանոցների կառուցման:
«Այս տարվա հուլիսի 1-ից հանրապետությունում անասունների սպանդը պետք է իրականացվի բացառապես հատուկ սպանդանոցներում: Այդ պատճառով այն հողերը, որոնց վրա նախատեսվում է դրանց կառուցումը, օտարվելու են պարզեցված ընթացակարգով: Այսպիսով, տեղական ինքնակառավարման մարմինների բյուջեները կսկսեն համալրվել լրացուցիչ ֆինանսական ռեսուրսներով, դրանց հնարավորությունները կավելանան նաեւ մրցույթների կազմակերպման եւ անցկացման գործում»,- հավելեց Սուրեն Պապիկյանը:
