Ճապոնիայի իշխանությունները մտադիր են խստացնել հեռահաղորդակցային եւ էլեկտրոնային սարքավորումների գնումներին ներկայացվող պահանջները այն կազմակերպությունների համար, որոնք կապված են կառավարության հետ, կամ նրանց, որոնք աշխատում են քաղաքացիների անձնական տվյալներով: Yomiuri պարբերականն այսօր հայտնել է, որ այսպիսի քաղաքականությունն արդյունքում կհանգեցնի չինական արտադրանքի մատակարարումներից ամբողջական հրաժարման, այդ թվում՝ Huawei-ի եւ ZTE-ի արտադրության, փոխանցում է ՏԱՍՍ-ը:
Նոր պահանջներն առնչվում են ոչ միայն գնումների գներին, այլ նաեւ համակարգիչների, կապի սարքերի անվտանգությանը: Դրանք առաջին հերթին պետք է կայուն լինեն անհատական տեղեկություններ հափշտակելու նպատակով կիբեռհարձակումների հանդեպ: Նշվում է, որ նոր կանոնները կիրառվելու են հունիսից:
Դրանք տարածվում են ընդհանուր շուրջ 200 տարբեր կազմակերպությունների վրա, ներառյալ Միջուկային կարգավորման հանձնաժողովը եւ Ճապոնական կենսաթոշակային հիմնադրամը: Նրանք գնումներ իրականացնելիս պետք է խորհրդակցեն կառավարությանն առընթեր կիբեռանվտանգության կենտրոնում աշխատողների հետ:
Ճապոնիայի իշխանությունների կողմից հեռահաղորդակցային սարքավորումներին ներկայացվող պահանջների վերանայման պատճառներից մեկը 2015 թվականին իրականացված խոշոր կիբեռհարձակումն էր երկրի կենսաթոշակային հիմնադրամի վրա: Դրա արդյունքում հափշտակվել էին ավելի քան 1,2 մլն մարդու տվյալներ:
2018 թվականի օգոստոսին ԱՄՆ նախագահ Դոնալդ Թրամփը հրաման էր ստորագրել, որով երկրի կառավարական գերատեսչություններին արգելել էր օգտագործել Huawei-ի եւ չինական մեկ այլ ընկերություն ZTE-ի արտադրած սարքավորումներ:
