Ճապոնիայի վարչապետ Սինձո Աբեն հաստատել է նոր 1.1 տրիլիոն դոլարի խթանման միջոցների փաթեթը, որը զգալի ուղիղ ծախսեր է ներառում՝ կորոնավիրուսով պայմանավորված աշխարհի երրորդ խոշոր տնտեսության խորը անկումը կանխելու համար, փոխանցում է Reuters-ը:
117 տրիլիոն իենի միջոցառումների փաթեթը մասամբ կֆինանսավորվի եւս մեկ լրացուցիչ բյուջեով: Ապրիլին իշխանություններն արդեն իսկ 117 տրիլիոն իենի խթանում են տրամադրել:
Նոր փաթեթի ընդունումից հետո Ճապոնիայի ընդհանուր ծախսերը կորոնավիրուսի ազդեցության դեմ պայքարի համար 234 տրիլիոն իեն (2.18 տրիլիոն դոլար) կկազմեն՝ երկրի ՀՆԱ-ի մոտ 40 տոկոսը:
Համախառն ծախսերը կորոնավիրուսի դեմ պայքարի խոշորագույն հարկաբյուջետային փաթեթներից մեկը կդառնա աշխարհում՝ իր չափով մոտենալով ԱՄՆ-ի 2.3 տրիլիոն դոլարի օգնության ծրագրի չափին:
Նոր փաթեթը 33 տրիլիոն իեն ուղղակի ծախսեր է ներառում, հայտնել են ֆինանսների նախարարությունը:
Միջոցառումների նոր փաթեթը նախատեսում է մեծացնել ծախսերը բժշկության համար, աջակցել այն ընկերություններին, որոնք դժվարանում են վճարել տարածքի վարձավճարները եւ լրացուցիչ սուբսիդիաներ տրամադրել այն ընկերություններին, որոնք տուժել են վաճառքների կտրուկ անկումից:
Համավարակի հնարավոր երկրորդ ալիքին նախապատրաստվելիս կառավարությունը 10 տրիլիոն իեն է պահեստավորել, որոնք կարող են օգտագործվել արտակարգ իրավիճակների ծախսերի համար:
Ֆինանսավորումը խթանելու համար կառավարությունը պարտավորվել է համավարակի հետեւանքով տուժած ընկերությունների ֆինանսական աջակցությունը հասցնել 140 տրիլիոն իենի՝ նախորդ 45 տրիլիոն իենի փաթեթր համեմատ՝ ընդարձակելով անտոկոս վարկավորումը եւ սուբսիդավորված վարկեր եւ կապիտալներ առաջարկելով: