Կալինինգրադի մարզում գտել են սաթի գրեթե 2,5 կգ քաշով եզակի բնակտոր: Քարն անվանել են «Հաղթողը»՝ Ռուսաստանում եւ ամբողջ աշխարհում COVID-19-ի դեմ արագ հաղթանակի հույսով, փոխանցում է RG-ն:
Կալինինգրադի սաթի կոմբինատում գտածոն լավ նշան են համարում: Բանն այն է, որ եզակիներին են դասվում այն քարերը, որոնց քաշը սկսվում է 1 կիլոգրամից, որոնք բավականին հազվադեպ են հանդիպում: Համավարակի պատճառով սաթի արդյունահանման սեզոնը մեկնարկել է ոչ թե ապրիլին, այլ մայիսին, եւ մասնագետները «Հաղթողին» հայտնաբերել են հենց առաջին օրերին: Դրանից բացի, բնությունը փայլաքարին պարգեւել է խորհրդանշական պատկեր, որը հիշեցնում է եռաժանի կամ թագ:
«Հաղթողը», ինչպես եւ սաթե մյուս եզակի բնակտորները, կտեղափոխեն Մոսկվա՝ Ռուսաստանի «Գոխրան»: Այնտեղ հատուկ հանձնաժողովը կգնահատի հանքապարը եւ կորոշի նրա հետագա ճակատագիրը: Առանց ջարդվածքների եւ ճաքերի քարերը, որոնք թանկարժեք են ճանաչվում, պահպանվում են «Գոխրանում»: Բնակտորների մի մասը համալրում է Կալինինգրադի սաթի կոմբինատի թանգարանային հավաքածուն, մնացյալը վաճառվում է հատուկ աճուրդներում:
Կալինինգրադի մարզում սաթն արդյունահանում են ոչ մեծ Յանտարնի բնակավայրում: Այստեղ է կենտրոնացած «արեգակնային քարի» աշխարհում ամենամեծ հանքավայրը: Անցյալ տարի Յանտարնիյում ընդերքից հանվել է ավելի քան 450 տոննա սաթ, այդ թվում 18 եզակի բնակտորներ:
