2019 թվականին արձանագրվել է հանցագործության 26850 դեպք: Այս մասին այսօր՝ հունիսի 1-ին, Ազգային ժողովի նիստում հայտարարեց գլխավոր դատախազ Արթուր Դավթյանը՝ ներկայացնելով դատախազության գործունեության մասին հաշվետվությունը:
Նրա խոսքով՝ նախորդ տարվա համեմատ հանցագործություններն աճել են 8,8 տոկոսով (2172 դեպք):
Գլխավոր դատախազը նշեց, որ լավացել է հաղորդագրությունների գրանցման որակը, ինչին նպաստել է այն, որ անփույթ աշխատակիցները պատասխանատվության են ենթարկվել:
2008-2018 թվականներին ընդհանուր հանցագործությունների կազմում ծանր եւ առանձնապես ծանր հանցագործությունների տեսակարար կշիռն արտահայտող միջին տարեկան տոկոսային ցուցանիշը կազմել է 28 տոկոս: Մինչդեռ 2019-ին ծանր եւ առանձնապես ծանր հանցագործությունները կազմել են ընդհանուր հանցագործությունների ընդամենը 17,8 ոկոս: Այսինքն՝ 100 հազար բնակչին բաժին է հասնում 906 դեպք: Այդ առումով, գլխավոր դատախազի խոսքով, Հայաստանը շահավետորեն տարբերվում է նախկին ԽՍՀՄ երկրներից:
4 տոկոսով նվազել է բացահայտման ցուցանիշը:
2019-ին արձանագրվել է 47 սպանություն, ինչը 12-ով շատ է, քան 2018-ին:
Բացի այդ, էապես մեծացել է ծանրաբեռնվածությունը. մեկ քննիչին բաժին է հասնում 102-130 գործ:
