Դուք համեմատել եք վարչապետի հայտարարության մեջ նշված համապատասխան թիվը հիմնադրամի կայքի համապատասխան տվյալների հետ եւ հակասություն եք տեսել, ներկայացրեք այդ հակասությունը եւ պահանջեք այդ հիմքով քրեական վարույթ սկսել: Այս մասին հունիսի 1-ին Ազգային ժողովի նիստում ասաց գլխավոր դատախազ Արթուր Դավթյանը՝ իր ղեկավարած գերատեսչության գործունեության մասին հաշվետվությունը ներկայացնելիս պատասխանելով պատգամավոր Տիգրան Ուրիխանյանի այն հարցին, թե ո՞ւր են գնացել Զինծառայողների ապահովագրության հիմնադրամի դրամական միջոցները:
Դավթյանի խոսքով, սակայն, քրեական վարույթ իրականացնելու անհրաժեշտություն չկա՝ նվազագույնը մեկ պատճառով՝ հիմնադրամում հանցագոծությունները չեն կատարվում այդպիսի պարզ մեխանիկական հաշվարկով:
Գլխավոր դատախազը նաեւ նշեց, որ իր համար հասկանալի չէ պատգամավորների բարձրաձայնած «գաղտնի ծախսեր» ձեւակերպումը: «Կան կոնֆիդենցիալ եւ հրապարակման ոչ ենթակա որոշ տվյալներ, որոնք օրենքի ուժով չեն կարող արտացոլվել հաշվետվություններում: Կոնֆիդենցիալ տվյալները վերաբերում են բացառապես մուտքերին, կարծում եմ՝ դուք այս մասին պետք է որ շատ լավ իմանաք»,- պարզաբանեց Դավթյանը:
Նա ընդգծեց, որ Ուրիխանյանը եղել է Զինծառայողների ապահովագրության հիմնադրամի Հոգաբարձուների խորհրդի անդամ, իսկ Խորհուրդն օժված է եղել լայն լիազորություններով, ինչը վկայում է այն մասին, որ պատգամավորն այս պարզաբանումները ստանալու բոլոր հնարավորություններն ուներ:
