ԱԺ նախկին նախագահ Գալուստ Սահակյանի որդին՝ Արման Սահակյանը մեղադրվում է ՀՀ ՔՕ 308-րդ հոդվածի 2-րդ կետով (պաշտոնեական լիազորությունների չարաշահման մեջ, ինչը առաջացրել է ծանր հետեւանքներ): Այս մասին NEWS.am-ի հարցին ի պատասխան հայտնեց ՀՀ ՔԿ տեղեկատվության եւ հասարակայնության հետ կապերի բաժնի պետի պաշտոնակատար Ռիմա Եգանյանը:

Նա հայտնեց, որ Սահակյանի նկատմամբ որպես խափանման միջոց է կիրառվել 5 միլիոն ՀՀ դրամ գրավը:

Նշենք, որ ՔԿ-ի լրատվությունից NEWS.am-ին հայտնել էին, որ Արման Սահակյանը մի քանի այլ անձանց հետ Երեւանի դպրոցներից մեկին կից հողակտորի օտարման հետ կապված քրեական գործի շրջանակում ներգրավվել է որպես մեղադրյալ:

Սահակյանի փաստաբանը հայտարարել էր, որ Սահակյանին մեղադրանք առաջադրելն ունի քաղաքական ենթատեքստ, եւ, որ առաջադրված մեղադրանքն ակնհայտ անհիմն է, եւ հիմնված վարույթն իրականացնող մարմնի չփաստարկված ենթադրությունների վրա, որոնք ուղղակի չեն կարող լինել ողջամիտ։