ՀՀ վարչապետ Նիկոլ Փաշինյանը քաղաքացիներին կոչ է անում հակահամաճարակային խախտումները լուսանկարել կամ տեսագրել եւ ուղարկել իրեն։ Այս մասին նա գրել է ֆեյսբուքյան իր էջում։
«Սիրելի հայրենակիցներ.
Խնդրում եմ հակահամաճարակային կանոնների խախտման աղաղակող դեպքերը տեսանկարահանեք, լուսանկարահանեք եւ ուղարկեք իմ այս ֆեյսբուքյան էջին, հնարավորինս կոնկրետ եւ ճշգրիտ նշելով խախտման վայրը, ժամկետը, դրա հետ առնչություն ունեցող ֆիզիկական եւ իրավաբանական անձանց»,- գրել է նա։
Ավելի վաղ վարչապետը հրապարակել էր լուսանկար, որտեղ Երեւանի Մարգարյան փողոցի «Հայփոստի» բաժանմունքի դիմաց հավաքվել էին քաղաքացիներ։
«Ըստ լուսանկարն ուղարկած օգտատիրոջ՝ այսօր, ժամը 11.00, Երեւանի Մարգարյան փողոցի «Հայփոստի» բաժանմունք»,- գրել էր նա։
Մի լուսանկար էլ վարչապետը հրապարակել էր Երեւանի 33 համարի ավտոբուսից, որտեղ ուղեւորները կանգնած էին, պահված չէր սոցիալական հեռավորությունը։
«Ըստ օգտատիրոջ, Երեւանի 33 համարի ավտոբուսը երեկ ժամը 16:43-ին, Արշակունյաց պողոտայում»,- գրել էր նա։
Մի լուսանկար հրապարակել էր նաև հայտնի ուխտագնացությունից և գրառում արել.
«Սա արդեն հայտնի ուխտագնացության հայտնի տեսարաններից է. այս ընթացքում հարյուրավոր լուսանկարներ, տեսանյութեր եկան. չեմ հասցնում հետեւել»։
Մի լուսանկար հրապարակել է «Արմենիա» բժշկական կենտրոնից և մեկ լուսանկար էլ՝ Նոր-Նորքից:
Նշենք, որ մի լուսանկար էլ Փաշինյանը հրապարակել էր Վանաձորից. ««Գլորիա» ֆաբրիկայի աշխատողները տուն գնալիս։ Ահա թե ովքեր եւ ինչպես են ապահովում ռեկորդային թվեր Հայաստանի համար»։
