Երկու ամիս է նույն վիճակն է, բանկերի մոտ այդ հերթերը եղել են, եւ որեւէ մեկը դրանով չի զբաղվել, թոշակները նույնկերպ բաժանվել են, էլի միջամտություն չի եղել: Այս մասին, այսօր՝ հունիսի 3-ին, ԱԺ-ում լրագրողների հետ զրույցում նշեց «Լուսավոր Հայաստան» խմբակցության ղեկավար Էդմոն Մարուքյանը:
«Հիմա վարչապետի կողմից էդ լուսանկարները տեղադրել, թե իբր նոր եղավ, այդպես չի: Այդ ժամանակի ընթացքում համապատասխան մարմիններն իրենց վրա դրված պարտականությունները չեն արել: Լավ է ուշ, քան երբեք: Գոնե այսօրվանից սկսած այդ հեռավորությունը պահպանվի, կանոնները պահպանվեն»,-ասաց Մարուքյանը՝ հավելելով, որ դա բանկերի խնդիրն , որ ապահովեն կանոնները:
«Բայց մենք տեսանք նաեւ բազմաթիվ ծնունդներ, կնունքներ: Համապատասխան մարմինները հետեւե՞լ են, տեսնեն՝ նման բան տեղի է ունենում թե ոչ»,-ասաց Մարուքյանը:
Ինչ վերաբերում է սահմանափակումների հնարավոր խստացմանը, նա նշեց, որ ավելի խիստ սահմանափակումներ կարող են լինել, եթե մարդկանց տրվեն ապրելու միջոցներ. «Օրինակ նրանց փոխարեն վճարեն կոմունալները, փող տան, որ ապրեն: Չի կարող տոտալ կարանտին լինի, բայց մարդկանց փող չտան ապրելու: Հետեւաբար կառավարությունը ծանր վիճակի առջեւ է կանգնած: Դրա համար պետք է միջոցներ ունենա: Եթե կարիքը լինի, դա պետք է արվի, բայց ողջամտության սահմաններում: Եթե առաջարկն այն է, որ երկու շաբաթով փակվի, դա ողջամիտ չի, որովհետեւ այսօրվա վարակվածը 14 օրից է իմանալու վարակվելու մասին: Ես կարծում եմ, որ եղած սահմանափակումները ճիշտ կիրառելու մեջ է բանալին, որ ոսկե միջինը գտնենք: Ոչ թե սահմանափակումներն ունենաք թղթի վրա, իրական կյանքում այլ բան լինի»,-ասաց նա: