Բնական է, որ համավարակի համար պատասխանատուները պետք է ընդունեն, որ այն քաղաքականությունը, որ ներդրել ու կիրառել են, ունեն բացթողումներ, հետեւաբար այդ մարդիկ պետք է ազատվեն: Այս մասին, այսօր՝ հունիսի 3-ին, ԱԺ-ում լրագրողների հետ զրույցում նշեց «Լուսավոր Հայաստան» խմբակցության ղեկավար Էդմոն Մարուքյանը:
«Այն մահերի թիվը, որ ունենք, ակնհայտ է, որ առանց պատասխան տալու անհնար է էջը թերթել: Բայց հիմա նախ պետք է դուրս գալ այս իրավիճակից, նոր խոսել այդ մասին: Չեմ կարծում, որ հիմա դրա ժամանակն է»,-ասաց նա:
Անդրադառնալով վարչապետի հայտարարությանը, որ եթե կառավարությունը մեղավոր է, ապա մեղավոր է նաեւ ժողովուրդը, որ բերել է այս կառավարությանը, եւ որ հիմա մեղավորներ փնտրելու ժամանակը չի, Մարուքյանն ասաց. «Ես դեռ երեկ եմ ասել, որ հիմա մեղավորներ փնտրելու ժամանակը չի: Ժամանակը կգա, ԱԺ-ում քննիչ հանձնաժողով կստեղծենք եւ մեղավորներին բոլորին կկանչենք կխոսենք այդ ամենի մասին: Երկրորդ, հիմա մեղքը ժողովրդի վրա բարդելու ժամանակն էլ չի: Պետք է յուրաքանչյուրն իր օրինակով այս իրավիճակի վրա ազդեցություն ունենա»: