ԱԺ ԲՀԿ-ական պատգամավոր Նաիրա Զոհրաբյանը անընդունելի է համարում կորոնավիրուսի տարածման ողջ պատասխանատվությունը քաղաքացիների վրա գցելը, ինչը, նրա խոսքով, նկատելի է վերջին շրջանում։
«Այո, քաղաքացին պարտավոր է լինել օրինապահ, հետեւել պարետատան կանոններին, բայց եկեք հասկանանք՝ ինչ են արել համաճարակի համար պատասխանատու կառույցները, արդյոք նրանք արել են ամեն ինչ, որպեսզի այսօր չխոսեն սպեցնազ մտցնելու մասին, չխոսեն դուբինկաներով առողջություն պարտադրելու մասին։ Չփորձեք քաղաքացու վրա գցել պատասխանատվություն։ Կառավարությունն այսօր բարոյական իրավունք չունի պատասխանատվությունը գցել Հայաստանի քաղաքացու վրա»,- այսօր՝ հունիսի 3-ին, ԱԺ ամբիոնից ելույթ ունենալիս հայտարարեց պատգամավորը։
Նաիրա Զոհրաբյանի խոսքով՝ պաշտոնյաների՝ իրար հակասող հայտարարությունները մեծ դեր են խաղացել քաղաքացիներին «մոլորեցնելու» հարցում։ Ըստ պատագամավորի՝ մեղավորներ փնտրելու փոխարեն կառավարությունը պետք է որոշումներ կայացնի, լսի ոլորտի մասնագետներին՝ չհամարելով, որ իրենք անքննելի են ու ամեն ինչ կարող են։
