Apple-ն արգելափակում է ոստիկանության կողմից աֆրոամերիկացիների նկատմամբ դաժանությունների դեմ բողոքի ցույցերի ընթացքում անկարգությունների ժամանակ ընկերության խանութներից գողացված iPhone սմարթֆոնները, հայտնում է ՏԱՍՍ-ը՝ վկայակոչելով CNN-ը:
Հաղորդվում է, որ ընկերությունը գողացված սմարթֆոններին նախազգուշացում է ուղարկում սարքը խանութը վերադարձնելու խնդրանքով եւ հասցեով: «Սարքը արգելափակված է եւ հետեւվվում է: Տեղական իշխանությունները նախազգուշացվել են»,- մեջբերում է հեռուստաընկերությունը հաղորդագրությունների բովանդակությունը:
Մայիսի կեսից Apple-ը բացել էր իր տասնյակ խանութներն ԱՄՆ-ում, որոնք ժամանակավորապես փակվել էին կորոնավիրուսի համավարակի պատճառով: Թալանվել են Նյու Յորքի, Ֆիլադելֆիայի եւ Վաշինգտոնի խանութները:
Վերջին օրերին Մինեսոտայում եւ շատ այլ նահանգներում զանգվածային բողոքի ցույցեր եւ անկարգություններ են տեղի ունենում աֆրոամերիկացի Ջորջ Ֆլոյդի մահվան կապակցությամբ: CNN- ի փոխանցմամբ՝ ԱՄՆ-ում ցույցերի և անկարգությունների ընթացքում 9.839 մարդ է ձերբակալվել:
