Իրանի ԱԳՆ պաշտոնական ներկայացուցիչ Աբաս Մուսավին հայտարարել է ԱՄՆ քաղաքացի Մայքլ Ռեյ Ուայթին ազատելու մասին, որը բանտարկության էր դատապարտվել անվտանգության խախտման եւ մասնավոր հայցվորների բողոքի հիման վրա, փոխանցում է ԻՌՆԱ-ն:
«Կորոնավիրուսի բռնկումից հետո դատական իշխանության ղեկավարի ընդհանուր հրամանով Ուայթն ազատվել է եւ հանձնվել Շվեյցարիայի դեսպանատուն, որը երկրում ներկայացնում է ԱՄՆ կառավարության շահերը»,- ասել է նա: «Նա այս ժամանակահատվածում կորոնավիրուսի որոշ կասկածելի ախտանիշների պատճառով բուժվում էր, այն բանից հետո, երբ պարզվեց, որ կորոնավիրուսի ախտորոշման նրա թեստը բացասական է, նրա ազատման հրամանը կատարվել է»,- հավելել է նա: «Ուայթի ազատման հետ միաժամանակ ազատվել է իրանցի գիտնական Մաջիդ Թահերին, որը Միացյալ Նահանգներում բանտարկված էր կեղծ մեղադրանքով»,- շարունակել է Մուսավին:
Իրանի ԱԳ նախարար Մոհամմեդ Ջավադ Զարիֆն իր Twitter-յան էջում, վկայակոչելով Մաջիդ Թահերիի ազատումը, նշել է, որ «այս գործընթացը կարող է տեղի ունենալ բոլոր բանտարկյալների հետ»: «Իրանցի բոլոր պատանդները, որոնք Միացյալ Նահանգների խնդրանքով պատանդ են վերցվել այլ երկրներում կամ այդ երկրում, պետք է տուն վերադարձվեն»,- նշել է նա:
Թահերին իրանցի բժիշկ է, որը 33 տարի բնակվում է Միացյալ Նահանգներում եւ աշխատում Ֆլորիդայում: ԱՄՆ կառավարությունը նրան մեղադրել էր Իրանի դեմ պատժամիջոցների շրջանցման մեջ, նա կալանավորված էր գրեթե 16 ամիս:
