Եթե մեկի անձնական կյանքի իրավունքը խախտվել է, նա ունի քաղաքացիական դատավարության կարգով դատարան դիմելու իրավունք: Այս մասին, այսօր՝ հունիսի 5-ին, ԱԺ-ում ավանդական ճեպազրույցների ժամանակ նշեց «Լուսավոր Հայաստան» խմբակցության ղեկավար Էդմոն Մարուքյանը՝ խոսելով վարչապետ Նիկոլ Փաշինյանի կողմից լուսանկարներ հրապարակելու մասին:
«Ես տեսա, որ քրեական մասով էլ կային գրառումներ: Քրեական օրենսգրքով հոդված կա անձի մասին տեղեկություններ հավաքելու, պահելու ու տարածելու մասին: Դրա տակ էլ կարող է ընկնել: Բայց ես չեմ կարող քրեաիրավական գնահատական տալ, քանի որ չգիտեմ, թե ով է հավաքել, պահել: Տարածողին գիտեմ:
Եթե այդ աղջկա ընտանիքն ուզենա, կարող է դատական հայց ներկայացնել: Եթե դա լիներ օրինակ Դանիայում, վստահ եմ, որ այդպես կլիներ: Հայաստանում միգուցե դրան չհասնի, սակայն մենք էլ ունենք բոլոր իրավական գործիքները»,-ասաց նա:
Ինչ վերաբերում է գրված հայհոյանքներին, Մարուքյանը նշեց, որ դա էլ վերջին տարիներին ձեւավորված մշակույթի արդյունքն է. «Դուք տեսե՞լ եք, թե ինչպիսի այլանդակ հայհոյանքներ են հնչում մեր հասցեին: Իշխանությունը որեւէ բան չի արել, քանի որ հայհոյել են ընդդիմախոսներին: Երբ իրենց հայհոյեն, ինչ-որ բան կանեն»:
Նշենք, որ ավելի վաղ ֆեյսբուքյան էջում Նիկոլ Փաշինյանը հրապարակել էր մետրոյում առանց դիմակի նստած աղջկա լուսանկար, որտեղ երեւում էր աղջկա դեմքը եւ հետեւյալ գրառումն արել ՝ անթաքույց գեղեցկություն։ Այս լուսանկարը բուռն քննադատությունների մեծ ալիք էր բարձրացրել սոցիալական հարթակում, ինչից հետո Փաշինյանը լուսանկարը հեռացրել էր իր էջից։
.jpeg)
