Ըստ նախնական հաշվարկների՝ 2019-ին ՀՀ ԱԻՆ-ի կարիքների համար պետք է 12.6 միլիարդ դրամը հատկացվեր, սակայն մի շարք ճշտումներից հետո նախարարության համար ծախսերն ավելացան մինչեւ 15.1 միլիարդ դրամ: Այս մասին հունիսի 5-ին ՀՀ Ազգային ժողովի մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի մասին զեկույցի քննարկմանն ասաց ՀՀ ֆինանսների նախարար Ատոմ Ջանջուղազյանը:
Ընդ որում, այդ միջոցներից ծախսվել է 14.6 միլիարդ դրամ, ինչը հատկացված միջոցների ընդհանուր գումարի 97 տոկոսն է կազմում: «Նախարարությունը 7 միջոցառում է իրականացրել, որոնց մեծ մասը, ինչպես եւ սպասվում էր, բաժին է ընկել Արտակարգ իրավիճակների նախարարության փրկարար ծառայությանը»,- պարզաբանեց նախարարը՝ նշելով, որ ընդհանուր գումարից 11.1 միլիարդ դրամ է հատկացվել Արտակարգ իրավիճակների նախարարության փրկարար ծառայության կարիքների համար: Այս գումարից 10.7 միլիարդ դրամ է ծախսվել, ինչը 96.1 տոկոսն է կազմում:
