Աշխատանքից ազատման դիմում գրած ՊԵԿ նախագահ Դավիթ Անանյանի ու վարչապետ Նիկոլ Փաշինյանի միջև մասնագիտական պրոֆեսիոնալ դաշտում որևէ խնդիր չի եղել: Այս մասին այսօր՝ հունիսի 5–ին, NEWS.am-ի հետ զրույցում վստահեցրին ՊԵԿ լրատվական ծառայությունից։
«Տարաձայնությունը եղել է աշխատանքային բնույթի՝ կապված կադրային խնդրի հետ եւ Դավիթ Անանյանը նախընտրել է ինքն անձամբ հեռանալ, քան թե ոլորտում երկարամյա փորձ ունեցող արդյունավետ կադրերից մեկին հեռացնի»,– ասացին ՊԵԿ լրատվական ծառայությունից։
Հիշեցնենք, որ ՊԵԿ-ի նախագահ Դավիթ Անանյանը երեկ իր ֆեյսբուքյան էջում գրել էր, որ ՀՀ վարչապետին է ներկայացրել աշխատանքից ազատման դիմում։
Այսօր էլ ԱԺ մշտական հանձնաժողովների համատեղ նիստում 2019 թվականի բյուջեի կատարողականի քննարկման ժամանակ Նիկոլ Փաշինյանը խոսեց ՊԵԿ–ում սպասվող փոփոխությունների մասին։
«ՊԵԿ-ում նոր փոփոխություններ կլինեն առաջիկայում: Հույս ունենք, որ բովանդակային փոփոխությունները, որ սկսվել են պարոն Անանյանի ղեկավարման շրջանում, ավելի կխորանան եւ ընդգրկուն կդառնան»,-նշեց նա:
Նշենք, որ ըստ մամուլի հրապարակումների՝ ՊԵԿ նախագահի հրաժարականի պատճառը եղել է Արարատյան մաքսատանն արված լուսանկարները, որտեղ պահպանված չէին հակահամաճարակային կանոնները։
«Վարչապետը պահանջել է ՊԵԿ նախագահից աշխատանքից անհապաղ ազատել այդ մաքսատան ղեկավար Մհեր Մարտիրոսյանին։ Սակայն Անանյանը հրաժարվել է կատարել վարչապետի պահանջը՝ դա հիմնավորելով նրանով, որ Մարտիրոսյանը երկարամյա մասնագետ է, իր գործի պրոֆեսիոնալը ու ՊԵԿ նախագահն անարդար ու անիմաստ է համարել մարդկանց կուտակումների համար մաքսային գործի մասնագետին աշխատանքից ազատելը», - գրել էր «Հրապարակ»-ը։
