Ֆրանսիայի իշխանությունները պատրաստվում են մինչեւ 135 եվրոյի հասցնել տուգանքի չափն այն մարդկանց համար, որոնք նետում են փողոցներում բժշկական դիմակներ, ձեռնոցներ եւ ծխախոտի մնացորդներ։ Այդ մասին կիրակի հայտնել է Ֆրանսիայի բնապահպանության նախարարի պետքարտուղար Բրյուն Պուարսոնը, հաղորդում է ՏԱՍՍ-ը։
Այդ մասին հրամանը երկրի իշխանությունները մտադիր են ներկայացնել հունիսի կեսերին։ Ընդ որում՝ ոստիկանության կողմից արձանագրություն կազմելու եւ դա դատարան ուղարկելու դեպքում տուգանքի չափը կարող է հասնել մինչեւ 750 եվրոյի։ Ներկայում տուգանքը կազմում է 68 եվրո։
Բնապահպանների խոսքով՝ մայիսի 11-ից ինքնամեկուսացման ռեժիմի թուլացման հետ մեկտեղ Ֆրանսիայի խոշոր քաղաքների փողոցներում, հրապարակներում, այգիներում եւ այլ հանրային վայրերում էլ ավելի հաճախ են նկատվում օգտագործված դիմակներ եւ ձեռնոցներ։ «Յուրաքանչյուր մարդ պետք է հասկանա, որ ցանկացած աղբը, որը հայտնվել է գետնին, հաճախ հայտնվում է օվկիանոսներում»,-ասել է Պուարսոնը։
Մարտի կեսերին պանդեմիայի կապակցությամբ Ֆրանսիայում սահմանվել էր ինքնամեկուսացման ռեժիմ, որը տեւել էր շուրջ երկու ամիս։ Կարանտինի ընթացքում ամբողջ երկրում փակ էին խանութները, որոնք չէին վաճառում առաջին անհրաժեշտության ապրանքներ, ռեստորանները, հյուրանոցները։ Երկրում սահմանափակումները մասամբ մեղմացվել են, սակայն արտակարգ դրությունը շարունակվելու է մինչեւ հուլիսի 10-ը։
Համաձայն առողջապահության նախարարության վերջին տվյալների՝ Ֆրանսիայում պանդեմիայի ամբողջ ընթացքում մահացել է ավելի քան 29 հազար մարդ։ Երկրում ընդհանուր առմամբ գրանցվել է վարակման ավելի քան 150 հազար դեպք։
