Սահմանին գազի գինը էական ազդեցություն ունի ՀՀ-ում սակագների վրա, քանի որ սպառողների կողմից վճարվող սակագնի շուրջ 70 տոկոսը ձեւավորվում է սահմանին գազի գնի մեծությունից: Այս մասին այսօր՝ հունիսի 8-ին, ԱԺ-ում լրագրողների հետ զրույց նշեց Հանրային ծառայությունները կարգավորող հանձնաժողովի նախագահ Գարեգին Բաղրամյանը:
Ինչ վերաբերում է նրան, որ Մոսկվան Բելառուսին ավելի էժան է գազը վաճառում, քան Հայաստանին, Հանձնաժողովի նախագահը նկատեց. «Չպետք է մոռանալ, որ մենք ունենք նաեւ Վրաստանի տարածքով անցնելու գին: Այսինքն Բելառուսի հետ համեմատելիս պետք է այդ գները առնվազն տարբերվեն Վրաստանի տարանցման գնի արժեքով: Իսկ մնացածը, թե ինչ բանակցություններ են ընթանում եւ որքան կլինի սահմանին գազի գինը, դա ես չեմ կարող ասել»:
Դիտարկմանը, որ կան պնդումներ, որ Հայաստանը պետք է վերանայի 2013 թվականի գազային «խայտառակ պայմանագրերը», Գարեգին Բաղրամյանն ասաց. «Ճիշտն ասաց, այդ պայմանագրերը կառավարությունների միջեւ է, ես ձեռնպահ կմնամ մեկնաբանությունից: Մասնագիտական գնահատականն այն է, որ կարծում եմ՝ ցանկացած պայմանագիր էլ կարող է վերանայվել: Այլ հարց է երկու կողմերի կամքը, դրան հասնելու հնարավորությունները»:
