Մեր ոլորտն այսօր բառացիորեն կաթվածահար է եղել, հազարավոր մարդիկ կարող են կորցնել իրենց աշխատանքը, հաճախորդները ցանկանում են հետ վերադարձնել իրենց կանխավճարները, որոնք տրվել էին մի քանի ամիս առաջ, եւ այս ամենը կարող է լարվածության աճի հանգեցնել: Այս մասին հունիսի 8-ին լրագրողների հետ հանդիպման ժամանակ հայտարարեց հաղորդավար Եփրեմ Մարգարյանը:
Նրա խոսքով՝ այս կապակցությամբ որոշում է կայացվել հունիսի 15-ին կրկին բողոքի ցույց անցկացնել: Մարգարյանը հիշեցրեց, որ իրենք հանդիպել են Կառավարության անդամների հետ, ներկայացրել են իրենց պահանջները եւ պատրաստակամություն են հայտնել զիջումների գնալ, բայց մինչ այժմ որեւէ արձագանք չի եղել:
«Ի թիվս այլ բաների, մենք առաջարկեցինք 20 օր պահել այցելուների ցուցակը, որպեսզի հետագայում հեշտ լինի պարզել շփումների շրջանակը, եթե կորոնավիրուս հայտնաբերվի: Առաջարկվել է նաեւ ոստիկանության աշխատակիցների եւ բուժաշխատողների ծառայություն կազմակերպել ռեստորաններում, որոնք կվերահսկեն անվտանգության չափանիշներին համապատասխանությունը: Մենք ուզում ենք հասկանալ, թե ինչով է պայմանավորված խտրական մոտեցումը տարբեր ոլորտների նկատմամբ. որոշ ոլորտների գործունեությունը թույլատրված է, իսկ մյուսներինը՝ ոչ»,- հավելեց Մարգարյանը:
Շոումեն Արա Սահակյանն իր հերթին նշեց, որ Կառավարության շենքի դիմաց բողոքի ցույցի նպատակը իրենց խնդիրների լուծումն էր: «Ես տեղին չեմ համարում խոսակցություններն այն մասին, որ մեր պահանջները քաղաքական ենթատեքստ ունեն»,- շեշտեց նա:
Հիշեցնենք, որ մայիսի 20-ին ռեստորանային բիզնեսի ներկայացուցիչները բողոքի ցույց էին անցկացրել, որի արդյունքում մի քանի մասնակից բերման էր ենթարկվել, իսկ ավելի ուշ ազատ էր արձակվել: